Rossiya prezidenti Vladimir Putin mudofaa vaziri Andrey Belousov, Bosh shtab boshlig‘i Valeriy Gerasimov, FXX direktori Aleksandr Bortnikov va Xavfsizlik kengashi kotibi Sergey Shoygu ishtirokida Kursk viloyatidagi vaziyatga bag‘ishlangan yig‘ilish o‘tkazdi.

Putinning so‘zlariga ko‘ra, Gerasimov tezkor boshqaruv punktlaridan birida. U Kursk yaqinidagi vaziyat haqida videoaloqa orqali ma’lum qildi.

Bosh shtab boshlig‘ining ta’kidlashicha, 6 avgust kuni Ukraina Qurolli kuchlarining ming kishidan iborat bo‘linmalari «Sudja tumani hududining bir qismini egallab olish maqsadida hujumga o‘tgan». Unga ko‘ra, Ukraina qurolli kuchlarining Kursk yo‘nalishi bo‘yicha Rossiyaga chuqur kirib borishi to‘xtatilgan. Uning ta’kidlashicha, Ukraina Qurolli kuchlarining yo‘qotishlari 315 kishini tashkil etgan, jumladan, kamida 100 kishi halok bo‘lgan, qolganlari yaralangan. Shuningdek, unga ko‘ra, 54 ta zirhli texnika, jumladan, yettita tank yo‘q qilingan.

«Operatsiya dushmanni tor-mor etish va davlat chegarasigacha chiqish bilan yakunlanadi», deb yakunladi Gerasimov o‘z hisobotini.

6 avgustga o‘tar kechasi Ukraina qo‘shinlari Rossiyaning Kursk viloyatiga kirdi va chegara zonasida mustahkam o‘rnashib oldi. Rossiya Mudofaa vazirligiga yaqin bo‘lgan «Ribar» harbiy telegram-kanalining xabar berishicha, 7 avgustga o‘tar kechasi Ukraina Qurolli kuchlari bo‘linmalari Sudja tumanidagi Nikolayevo-Darino, Sverdlikovo va Darino qishloqlarini ishg‘ol qilgan. Shuningdek, Ukraina qurolli kuchlari «Sudja» gaz taqsimlash stansiyasini egallagan, u orqali gaz Ukrainadan Yevropaga yetkaziladi.

Turli manbalarga ko‘ra, Ukraina qurolli kuchlarining bir yoki ikkita bataloni Kursk viloyati hududiga kirgan. Qayd qilinishicha, 400 nafargacha Ukraina Qurolli kuchlari harbiylari hududga kirgan, yana 2 ming nafari chegarada to‘plangan. Janglarda Ukraina va Rossiya tomoni texnikada yo‘qotishlarga uchragani ta’kidlanmoqda.