Yirik avtofiribgar Turkiyada ushlanib, O‘zbekistonga yuborildi. Bu haqda O‘zbekistonning Istanbul shahridagi Bosh konsulxonasi xabar berdi.

Ma’lum qilinishicha, Turkiya va O‘zbekiston Ichki ishlar vazirliklari hamkorligida Istanbul shahrida o‘tkazilgan tezkor tadbirda 1979 yilda tug‘ilgan Jahongir Hasanboyev qo‘lga olingan. U avtomobil oldi-sotdisi sohasida ko‘plab firibgarlik jinoyatlarini sodir etganlikda ayblanib 2014 yildan buyon qidiruvda bo‘lgan.

Hasanboyev O‘zbekistonning Istanbul shahridagi Bosh konsulxonasi xodimlari ishtirokida O‘zbekistonga deportatsiya qilingan.

“Jinoiy javobgarlikdan qochib xorijiy davlatlarda, shu jumladan Turkiyada yashirinib yurgan har bir shaxsga nisbatan jinoiy ta’qib izchil ravishda davom ettiriladi va jinoyat uchun javobgarlik prinsipi qat’iy ta’minlanadi”, deyiladi xabarda.

Jahongir Hasanboyevning xatti-harakatlaridan jabr ko‘rgan fuqarolardan O‘zbekistonning Istanbul shahridagi Bosh konsulxonasiga yoki Ichki ishlar vazirligi va uning quyi tizimlariga murojaat qilish so‘ralgan.

Oldinroq Interpol qidiruvida bo‘lgan o‘zbekistonlik Qirg‘izistonda qo‘lga olingani xabar qilingandi.