Joriy yilning 15 iyul kuni Toshkent shahridagi Singapur menejmentni rivojlantirish instituti va O‘zsanoatqurilishbank o‘rtasida tuzilgan ta’lim va tajriba almashish sohasidagi hamkorlikka ko‘ra dastlabki o‘quv kurslariga start berildi. Bunda “SQB lider ayollari” klubi a’zolari ta’lim dasturining ilk ishtirokchilari bo‘ldi.

Bankning Toshkent shahridagi Singapur menejmentni rivojlantirish instituti bilan imzolangan memorandumi asosida uch moduldan iborat “Inson kapitalini rivojlantirish loyihasi” ishlab chiqildi. Unda xodimlarni qayta tayyorlash, malakasini oshirish hamda xorijiy davlatlarda amaliyot o‘tashi qamrab olingan. Shuningdek, o‘quv dasturi loyihalarni boshqarish, biznes tahlili, bank mahsulotlarini muvaffaqiyatli sotish jarayonida muhim bo‘lgan marketing sirlari, liderlikni shakllantirish va rivojlantirish kabi modullarni o‘z ichiga oladi.

Ta’kidlash joizki, bu dastur ayollar o‘rtasida yangi iqtidor egalarini kashf qilish, salohiyatidan samarali foydalanish va boshqaruvda gender tenglikni ta’minlash kabi muhim vazifalar ijrosiga xizmat qiladi. Shuningdek, o‘quv dasturlarini muvaffaqiyatli tugatgan ishtirokchilar Angliya, Germaniya, Shveytsariya, Singapur, Koreya kabi xorijiy mamlakatlarda tajriba orttirib yuqori malakaga ega bo‘lishadi.

Reklama