Amerika Qo‘shma Shtatlarining Solt-Leyk-Siti shahri 2034 yilda qishki Olimpiya o‘yinlariga mezbonlik qiladi. Bu qaror Xalqaro Olimpiya Qo‘mitasi tomonidan tasdiqlandi.

Yuta shtati markazi 32 yildan so‘ng ikkinchi marta qishki Olimpiya o‘yinlariga mezbonlik qiladi. Solt-Leyk Siti bu o‘yinlarni qabul qilishga yagona da’vogar edi.

Solt-Leyk-Siti XOQ sessiyasida 83 ta ovoz oldi, 6 nafar delegat qarshi ovoz berdi.

Bu shahar 2002 yilda ham qishki o‘yinlarga mezbonlik qilgan. AQSh terma jamoasi Olimpiadada qo‘lga kiritilgan sovrinlar soni bo‘yicha ikkinchi (34) va medallar reytingida Norvegiya va Germaniyadan keyin uchinchi o‘rinni egallagan edi.

Shu bilan birga, 2030 yilgi qishki olimpiadani Fransiyaning Alp tog‘laridagi bir necha shaharlar qabul qiladi. Biroq, qayd qilinishicha, Fransiya hali moliyaviy kafolatlarni bermagan.

XOQ sessiyasida, agar mezbon tomon Butunjahon antidoping agentligining (WADA) dopingga qarshi kurashdagi ustuvorligini tan olmasa, o‘yinlarni o‘tkazish bo‘yicha shartnoma bekor qilinishi mumkinligi e’lon qilindi.

Navbatdagi qishki olimpiya o‘yinlari 2026 yilda Italiyaning Milan va Kortina-d’Ampetsso shaharlarida o‘tkaziladi.