O‘zbekistonda ko‘plab bolalarning o‘limiga sabab bo‘lgan «Dok-1 Maks» preparati ishlab chiqaruvchisiga Hindistonda ham jinoyat ishi qo‘zg‘atilib, bir qancha shaxslar tergovga tortilgan. Ammo u yerda olib borilayotgan tergov yoki sud jarayoni haqida hech qanday ma’lumot yo‘q. Kun.uz mazkur jinoyat ishi bo‘yicha batafsil ma’lumot olish maqsadida Hindistonning O‘zbekistondagi elchixonasida bo‘lib, elchining siyosiy masalalar bo‘yicha maslahatchisi Arif Said bilan suhbatlashgandi.

Arif Said iyul oyi oxirida keladigan delegatsiya har bir jihatga alohida to‘xtalib, to‘liq ma’lumot berishini ta’kidlab o‘tgandi.

Ma’lum bo‘lishicha, Hindiston farmatsevtika mahsulotlari eksportini qo‘llab-quvvatlash kengashi (Pharmexcil) 21-31 iyul kunlari Qozog‘iston, Tojikiston va O‘zbekistonga delegatsiya jo‘natgan. Xususan, ushbu delegatsiya 29-30 iyul kunlari Hyatt Regency Tashkent mehmonxonasida biznes uchrashuvlar o‘tkazishi ko‘zda tutilgan.

Hindiston elchixonasi va’da bergan ochiq matbuot anjumani va jurnalistlar savollariga javob berish masalasi kun tartibida yo‘q. Shu paytga qadar Hindistonda olib borilayotgan sud jarayoni haqida ham sukut saqlanib kelinmoqda.