CrowdStrike antivirusini yangilashda xatolik tufayli yuzaga kelgan Windows operatsion tizimining keng miqyosli nosozligi ushbu dasturiy ta’minot bilan ishlaydigan 8,5 million qurilmaga ta’sir qildi. Microsoft bu ma’lumotlarni o‘z blogida taqdim etdi. Gap Windows operatsion tizimida ishlaydigan barcha qurilmalarning bir foizdan kamrog‘i haqida ketmoqda, deb ta’kidladi operatsion tizim ishlab chiqaruvchisi.
Dasturiy ta’minotni yangilash ba’zan kompyuterlar bilan bog‘liq muammolarga olib kelishi mumkin, ammo CrowdStrike mahsuloti bilan bog‘liq yuqoridagi voqea kabi yirik hodisalar tez-tez sodir bo‘lmaydi, deya qayd etdi Microsoft. Nosozlik keng IT ekotizimidagi o‘zaro bog‘lanishlar ko‘lamini ko‘rsatadi va IT sohasi ishtirokchilariga mavjud mexanizmlardan foydalangan holda xavfsiz joylashtirish va avariya oqibatlarini bartaraf etishga ustuvor ahamiyat berish zarurligini eslatadi, deya qo‘shimcha qildi korporatsiya.
Windows ishidagi global nosozlik
19 iyun kuni ko‘plab mamlakatlarda Windows 10 operatsion tizimidagi global nosozlik tufayli aeroportlar, vokzallar, banklar, supermarketlar, telekanallar va davlat idoralari ishi to‘xtatildi.
CrowdStrike tezda xatoni topdi va shu kuni o‘z mahsulotiga tuzatish kiritdi. Microsoft nosozlikdan jabrlangan kompaniyalarga yordam berish uchun yuzlab dasturchilarni yo‘naltirdi, dedi korporativ xavfsizlik va operatsion tizimlar bo‘yicha vitse-prezident Devid Ueston.
Germaniya ham jabrlangan davlatlar qatoriga kirdi, biroq 20 iyul holatiga ko‘ra, ko‘plab sohalardagi vaziyat normal holatga qaytmoqda, deb ta’kidladi Axborot xavfsizligi federal boshqarmasi (BSI). CrowdStrike yangilanishiga xato kod qanday kirganligi hali to‘liq oydinlashtirilmagan, deya qo‘shimcha qildi idora. BSI vakillari ushbu masala bo‘yicha antivirus ishlab chiqaruvchisi bilan faol aloqada.
