21 iyul, yakshanba kuni Qo‘shma Shtatlardagi siyosatchilar Jo Baydenning prezidentlik poygasida qatnashmaslik qarori va davlat rahbari lavozimiga Kamala Harrisning ehtimoliy nomzodini turlicha baholadi.

Demokratlar Jo Baydenni poygadan chiqarish tarafdori

«Jo Bayden Amerikaning eng buyuk prezidentlaridan biri, shuningdek, mening yaqin do‘stim va sherigimdir», - dedi AQSh sobiq prezidenti Barak Obama Oq uy amaldagi rahbarining prezidentlik kampaniyasini tark etishi qarorini sharhlar ekan.

Obama Bayden prezidentligini olqishladi va u boshqa narsalar qatori «Amerikaning dunyodagi obro‘sini tikladi, NATOni jonlantirdi va butun dunyoni Rossiyaning Ukrainadagi agressiyasiga qarshi kurashga safarbar qildi», dedi. Obama AQSh prezidentining saylovlardan voz kechish qarorini «Jo Baydenning mamlakatga muhabbati isboti» va «haqiqiy davlat xizmatchisining yana bir bor Amerika xalqi manfaatlarini o‘z manfaatlaridan ustun qo‘yishi tarixiy namunasi» deb atadi. Obama Jo Baydenning Kamala Harrisning prezidentlikka taklif etilgan nomzodini bevosita qo‘llab-quvvatlamadi. 

AQSh sobiq prezidenti Bill Klinton va uning rafiqasi, prezidentlikka sobiq nomzod Hillari Klinton ham Jo Baydenning qarorini qo‘shma bayonotda qo‘llab-quvvatladi. «Bayden Amerikani misli ko‘rilmagan pandemiyadan olib chiqqan, millionlab yangi ish o‘rinlari yaratgan, vayron bo‘lgan iqtisodiyotni tiklagan, demokratiyamizni mustahkamlagan va dunyoda obro‘imizni tiklagan prezident sifatida xizmatini yakunladi», deyiladi unda. Klintonlar Kamala Harris nomzodini qo‘llab-quvvatlashga qo‘shilishlarini va «uni qo‘llab-quvvatlash uchun hamma narsani qilishlarini» aytib o‘tdi. 

«Prezident Jo Bayden har doim mamlakatimizni birinchi o‘ringa qo‘ygan amerikalik vatanparvardir. Qarashlari, qadriyatlari va yetakchiligi merosi uni Amerika tarixidagi eng buyuk prezidentlardan biriga aylantiradi», deb yozadi AQSh Kongressi Vakillar palatasining sobiq spikeri Nensi Pelosi. AQSh transport vaziri Pit Buttijich uning fikriga qo‘shildi: «Jo Bayden Amerika tarixidagi eng yaxshi va eng buyuk prezidentlar orasida o‘zining munosib o‘rnini egalladi», deb yozdi u va hozirgi Oq uy yetakchisi rahbarligida xizmat qilishdan faxrlanishini qo‘shimcha qildi. 

Respublikachilar Jo Bayden prezidentligini tanqid qilmoqda 

«Jo Bayden prezidentlikka nomzod bo‘lishga loyiq emas edi va u, albatta, xizmat qilishga tayyor emas edi. U prezidentlikka yolg‘on, soxta xabarlar orqali va yerto‘lasidan chiqmay kelgan», - deb yozgan nomzod Respublikachilar partiyasidan eng yuqori davlat lavozimiga nomzod, AQSh sobiq prezidenti Donald Tramp o‘zining Truth Social ijtimoiy tarmog‘ida. 

Keyinroq u Jo Baydenni AQSh tarixidagi eng yomon prezident deb atadi. «U debatda yo‘q qilindi, endi esa korrupsioner va radikal demokratlar uni chetga surib qo‘yishmoqda», deb tushuntirdi Tramp. Oq uy sobiq rahbari Baydenning prezident sifatidagi qarorlarini ham tanqid qildi: «Endi u bizning mamlakatimizga nima qilganiga qarang: millionlab odamlar chegaramizdan butunlay nazoratsiz va tekshirilmasdan o‘tmoqda, ularning aksariyati qamoqxonalardan, ruhiy kasalxonalardan kelgan. Biz uning prezidentligida juda ko‘p azob chekdik, lekin u yetkazgan zararni tezda bartaraf qilamiz». 

Bundan tashqari, Tramp CNN telekanaliga bergan izohida «Harrisni mag‘lub etish osonroq bo‘ladi», dedi. 

AQSh vitse-prezidentligiga Respublikachilar partiyasidan nomzod Jyeyms Devid Vens ijtimoiy tarmoqdagi akkauntida Baydenni «eng yomon prezident» deb atadi va Oq uy amaldagi rahbarining «har qadamida Kamala Harris yonida bo‘lganini» esladi. U Qo‘shma Shtatlar vitse-prezidentini Baydenning «ochiq chegaralar, uy-joy va oziq-ovqat narxlarining oshishiga olib kelgan firibgarlik siyosatiga» sherik bo‘lganlikda aybladi. Vens Donald Tramp bilan «Amerikani qutqarishga» tayyor ekanligini aytdi.

Florida gubernatori va respublikachi Ron Desantis Kamala Harrisni «Jo Bayden o‘z vazifalarini bajarishga yaroqsizligini yashirish va inkor etish bo‘yicha keng ko‘lamli kampaniya ishtirokchisi» deb atadi. «Demokratlar shunchaki «Titanik»dagi omon qolish qayiqlarini qayta tartibga solishmoqda», deb xulosa qildi Desantis. 

Jo Baydenning saylovdan voz kechishi 

Jo Bayden bir necha soat oldin AQSh prezidentligi saylovidan o‘z nomzodini qaytarib olishini e’lon qilgan edi. Amaldagi davlat rahbari bu qarorni Demokratik partiya va butun mamlakat manfaatlarini ko‘zlab qabul qilganini alohida ta’kidladi. Bayden tez orada xalqqa murojaat qilib, tafsilotlarni aytib berishini bildirdi. Uning qo‘shimcha qilishicha, amaldagi muddatining qolgan qismida asosiy e’tiborini prezidentlik vazifalarini bajarishga qaratadi. 

Bayden o‘z o‘rniga Kamala Harrisni taklif qilib, uni «to‘liq qo‘llab-quvvatlashini» bildirdi. «Demokratlar - birlashish va Trampni yengish vaqti keldi. Keling, buni qilaylik!» - deb yozdi u X ijtimoiy tarmog‘ida. 

Keyinchalik amaldagi vitse-prezident Kamala Harris AQSh prezidentligiga nomzodini qo‘yishni rejalashtirayotganini ma’lum qildi. 21 iyul, yakshanba kuni Amerika OAV uning so‘zlaridan iqtibos keltirdi: «Prezidentning tasdig‘ini olish men uchun katta sharaf va men bu nomzodlikni qo‘lga kiritish va g‘alaba qozonish niyatidaman». Harris respublikachi Donald Trampni mag‘lub etish uchun «Demokratik partiya va xalqni birlashtirish» maqsadida «hamma narsani qilishini» qo‘shimcha qildi.