NATO bosh kotibi Yyens Stoltenberg Shimoliy Atlantika alyansi a’zosi sifatida Qo‘shma Shtatlarni shu yilning noyabrida bo‘lib o‘tadigan prezidentlik saylovlaridan keyin ham o‘zini Rossiyadan himoya qilayotgan Ukrainani qo‘llab-quvvatlash darajasini susaytirmaslikka chaqirdi. Vashingtonning Ukrainani qo‘llab-quvvatlashda davom etishi «o‘ta muhim», dedi Stoltenberg 18 iyul, payshanba kuni Britaniyaning Vudstok shahrida bo‘lib o‘tgan Yevropa siyosiy hamjamiyati sammiti chog‘ida.
Ukrainani qo‘llab-quvvatlash qisqarishi istiqboli
Respublikachilar partiyasidan nomzod Donald Tramp Ohayo shtatidan senator Jyeyms Devid Vensni AQSh vitse-prezidenti lavozimiga o‘zining nomzodi sifatida tanishtirganidan so‘ng, ko‘plab kuzatuvchilar Tramp saylovda g‘alaba qozonsa, AQShning Ukrainaga harbiy va moliyaviy yordam ko‘rsatish darajasi sezilarli darajada kamayishi mumkinligidan xavotir bildirdi.
«Trampning o‘rinbosari Vens Ukrainadagi urushda Putinning pozitsiyasini ifodalaydi», deb yozgan Germaniyaning Frankfurter Rundschau gazetasi. U senator Ukrainaning bir qator hududlari Rossiya tarkibida qoladigan mavjud chegaralardagi front chizig‘ini muzlatish tarafdori ekanligini nazarda tutdi.
Yyens Stoltenberg 18 iyul kuni aytganidek, Ukrainani qo‘llab-quvvatlash «Shimoliy Amerika va Yevropaning birgalikdagi sa’y-harakatlari bilan» amalga oshirilishi kerak. Shu bilan birga, Qo‘shma Shtatlar, NATO bosh kotibining so‘zlariga ko‘ra, Kiyevning eng yaqin ittifoqchisi hisoblanadi.
Stoltenbergga ko‘ra, Ukrainani qo‘llab-quvvatlash AQSh manfaatlariga to‘g‘ri keladi. Agar Rossiya prezidenti Vladimir Putin «Ukrainada g‘alaba qozonsa, bu nafaqat ukrainaliklar uchun fojia bo‘ladi, balki dunyoni yanada xavfli va himoyasiz holga keltiradi», dedi Stoltenberg. «Agar biz haqiqatan ham Ukraina suveren, mustaqil davlat bo‘lishi haqida kelishuvga erishmoqchi bo‘lsak, buning uchun yo‘l Ukrainani ko‘proq qo‘llab-quvvatlashdan iborat», - deya xulosa qildi u.
