Donald Tramp Respublikachilar partiyasining Miluokidagi qurultoyida katta nutq so‘zladi. U prezidentlikka nomzod bo‘lishga rasman roziligini bildirdi, 13 iyul kuni Pensilvaniyada bo‘lib o‘tgan mitingda o‘ziga nisbatan uyushtirilgan suiqasd haqida gapirdi va hozirgi Amerika ma’muriyatini ichki va tashqi siyosatdagi muvaffaqiyatsizliklar uchun tanqid qildi. Ba’zi tarafdorlar qulog‘idan jarohat olgan Trampni qo‘llab-quvvatlash uchun Amerika bayrog‘ini quloqlariga taqib olishdi. Trampning nutqi taxminan bir yarim soat davom etdi va CNN telekanali ta’kidlaganidek, prezidentlikka nomzodning AQSh yaqin tarixidagi eng uzun nutqi bo‘ldi. «Meduza» Tramp nutqidan iqtiboslar keltirdi.
Tramp qurultoydagi nutqini AQSh prezidentligiga nomzodini qo‘yishga rasman rozilik berishdan boshladi (Respublikachilar partiyasi uni 15 iyulda rasman nomzod sifatida ko‘rsatgan edi), so‘ng darhol o‘ziga suiqasd qilingan kun haqida gapirishga o‘tdi.
U voqeani faqat bir marta tilga olishini aytdi, chunki buni «gapirish haqiqatdan ham juda og‘riqli». Tramp so‘zlariga ko‘ra, Pensilvaniyadagi mitingda u chiyillagan tovushni eshitgan va qulog‘ini changallab, qo‘li qonga belanganini ko‘rgan. «Men o‘zimga: «Voy, bu nima edi? Bu faqat o‘q bo‘lishi mumkin», dedim, deb eslaydi Tramp. Uning so‘zlariga ko‘ra, buni hujum ekanligini darhol anglagan. «Hamma joyda qon oqardi, lekin ma’lum ma’noda o‘zimni butunlay xavfsiz his qildim, chunki Xudo men tomonda edi», dedi Tramp.
Uning ta’kidlashicha, mitingdagi olomon o‘q uzilganidan keyin qochib ketmagan, chunki «odamlar uning juda jiddiy xavf ostida ekanini bilgan» va uni tark etishni istamagan.
«Men bu kechada bu yerda bo‘lmasligim kerak edi», dedi Tramp. «Yo‘q, kerak edi», deb javob berdi olomon unga. «Faqat Qudratli Xudoning inoyati bilan men bu sahnada sizning oldingizda turibman», deb qo‘shimcha qildi Tramp.
![](https://storage.kun.uz/source/10/SmQVCsMry53D9Rieht1_IyKj4uMY8v9p.jpg)
![](https://storage.kun.uz/source/10/SDdOyceeftki62jL3IFCJ2o0wptXR38F.jpg)
Shundan so‘ng respublikachi nomzod demokratlarni tanqid qilishda davom etdi va uning sudlarda ta’qib qilinishiga ishora etib, «jodugar ovi»ni to‘xtatishga chaqirdi. Uning so‘zlariga ko‘ra, Demokratik partiya «adolat tizimidan qurol sifatida foydalanishni va o‘zining siyosiy raqibini demokratiya dushmani deb atashni zudlik bilan bas qilishi kerak». Tramp Jo Bayden haqida gapirib, uni mamlakatga «AQSh tarixidagi eng yomon o‘nta prezident» birgalikda olib kelmagan zarar yetkazganlikda aybladi. Keyin u Baydenning nomi nutqda boshqa tilga olinmasligiga va’da berdi.
Tramp bo‘lajak saylovlarni «mamlakat tarixidagi eng muhimi» deb atadi, u mamlakatni «qobiliyatsiz rahbardan xalos qilishi kerak», dedi. Shundan so‘ng prezidentlikka nomzod o‘z dasturining asosiy bandlariga o‘tdi.
![](https://storage.kun.uz/source/10/FftBY0lGlhholqI_1IbBKkSzUgDx5Nza.jpg)
Soliqlar va inflatsiya
Tramp 2016-2020 yillardagi prezidentlik davrida tarixdagi eng keng qamrovli soliq imtiyozlarini ma’qullaganini va endi bundan ham ko‘proq narsani qilishini aytdi. U inflatsiya inqirozini foiz stavkalari va energiya xarajatlarini pasaytirish orqali hal qilishga va’da berdi.
Biroq, CNN telekanalining ta’kidlashicha, Tramp 2017 yilda imzolagan soliq imtiyozlari yalpi ichki mahsulot ulushi bo‘yicha ham, inflatsiyaga moslashtirilgan dollarlarda ham tarixdagi eng katta chegirma bo‘lmagan.
Migratsiya inqirozi
«Men chegaramizni yopib, ko‘p qismi barpo qilingan devorni yakunlash orqali noqonuniy immigratsiya inqiroziga barham beraman», dedi Tramp. Uning so‘zlariga ko‘ra, Qo‘shma Shtatlarning janubiy chegarasida migrantlarning «ommaviy bostirib kirishi» butun mamlakat bo‘ylab jinoyatchilik, qashshoqlik, kasallik va vayronagarchilikka olib keldi. Pensilvaniyada bo‘lib o‘tgan mitingda Tramp migrantlar inqirozi va o‘zining prezidentligi davrida jamoasi bu sohada amalga oshirgan «ulkan ish» haqida gapirayotganida o‘qqa tutilgan edi.
Urushlar va mojarolar
Tramp Amerikaning amaldagi ma’muriyati yaratgan «har qanday xalqaro inqirozga», jumladan, Rossiyaning «Ukraina bilan dahshatli urushiga» barham berishini aytdi. Uning qo‘shimcha qilishicha, agar u prezident bo‘lganida hech qachon bunga yo‘l qo‘ymasdi. Shuningdek, Tramp so‘zlariga ko‘ra, Isroilga doimiy hujumlar oqibatida Yaqin Sharqda boshlangan urush ham bo‘lmasdi. «Eron xonavayron edi. Eronda pul yo‘q edi. Hozir Eronda 250 milliard dollar bor. Ular bularning barchasiga so‘nggi ikki yarim yil ichida erishdilar», deb qo‘shimcha qildi u.
«Men yangi urushlarni boshlamagan birinchi prezident edim. Biz eng hurmatli edik. Va siz buni ko‘rdingiz. <…> Prezident Bush davrida Rossiya Gruziyaga bostirib kirdi. Prezident Obama davrida Rossiya Qrimni egallab oldi. Hozirgi ma’muriyat davrida Rossiya butun Ukrainada [hukmronlik qilmoqda]. Prezident Tramp davrida Rossiya hech narsani qo‘lga kiritmadi», dedi u.
Trampning ta’kidlashicha, Rossiya AQSh qo‘shinlari Afg‘onistondan olib chiqib ketilganini ko‘rgach, Jo Bayden ma’muriyatining noqobilligidan «ilohomlandi» va Ukrainadagi urushni boshladi. Tramp so‘zlariga ko‘ra, u «birgina telefon qo‘ng‘irog‘i bilan urushlarni to‘xtata oladi».
«Pensilvaniyadagi hujumchi bizning harakatimizni to‘xtatmoqchi edi, lekin haqiqat shundaki, bu harakat hech qachon menga tegishli emas edi. Bu har doim siz haqingizda bo‘lgan. Bu sizning harakatingiz. Bu mamlakatimiz tarixidagi eng yirik harakatdir. Buni to‘xtatib bo‘lmaydi», deb qo‘shimcha qildi Tramp nutqining oxirida.