Yevrokomissiya 17 iyul, chorshanba kuni Ukrainaga yordam jamg‘armasidan Kiyevga taxminan 4,2 milliard yevro miqdorida qo‘shimcha yordam berishni qo‘llab-quvvatladi. Biroq, yangi paket hali Yevropa kengashida Yevropa Ittifoqi davlat va hukumat rahbarlari tomonidan tasdiqlanishi kerak.

«Yevropa Ittifoqi kengashida qabul qilingandan so‘ng, ushbu mexanizm bo‘yicha Ukraina uchun YeI tomonidan ajratiladigan mablag‘larning umumiy miqdori 12 milliard yevroga yetadi», - deydi Yevrokomissiya rahbari Ursula fon der Lyayyen.

Yevrokomissiya qarorida qayd etilganidek, Ukraina moliyaviy yordam shartlari sifatida ilgari surilgan bir qator talablarni bajardi. Ular, xususan, soliq to‘lashdan bo‘yin tovlash va iqtisodiy jinoyatlarga qarshi yanada samaraliroq kurashish bo‘yicha islohotlar, shuningdek, davlat kompaniyalari boshqaruvidagi o‘zgarishlar, milliy energiya va iqlim rejasini qabul qilish zaruratidir.

Barcha qiyinchiliklarga qaramay, Ukraina Rossiyadan o‘zini himoya qilib, mamlakatni yanada tiklash va Yevropa Ittifoqiga a’zolik sari olg‘a siljish uchun muhim islohotlarni amalga oshirmoqda, dedi fon der Lyayyen. Uning qo‘shimcha qilishicha, u Yevropa Ittifoqi mamlakatlari yangi yordam paketini tezda tasdiqlashiga umid qilmoqda. 

2024 yil fevralida YeI kengashi Ukrainaga 50 milliard yevrolik Yevropa yordam jamg‘armasini tashkil etishni ma’qulladi. 2024 yildan 2027 yilgacha, to‘rt yilga mo‘ljallangan ushbu mablag‘lar grant va kreditlar ko‘rinishida berilishi rejalashtirilgan. Ular Ukraina davlatining qisqa muddatli ehtiyojlarini ham, mamlakatni qayta qurish va modernizatsiya qilish bo‘yicha o‘rta muddatli vazifalarni hal qilishni ham ta’minlashi kerak.