FIFA reytingi. O‘zbekiston bir pog‘ona yuqoriladi, Ispaniya 3-o‘ringa ko‘tarildi

Srechko Katanets shogirdlari 2023 yilni 68-o‘rinda yakunlagan bo‘lsa, Qatarda o‘tgan Osiyo kubogidan keyin 66-o‘ringa ko‘tarilgandi. Mart oyidagi FIFA kunlari doirasida Hongkongga qarshi JCh-2026 2-saralash bosqichidagi g‘alabalardan keyin (2:0, 3:0) O‘zbekiston milliy jamoasi JCh-2026 hal qiluvchi saralash bosqichi va Osiyo kubogi-2027ga yo‘llanmasiga ega chiqib, reytingda 64-o‘ringa yuqorilagandi. JCh-2026 2-saralashi doirasidagi Turkmaniston (3:1) va Eron (0:0) bilan o‘yinlardan keyin vakillarimiz yana ikki pog‘ona yuqorilab, 62-o‘rindan joy oldi. Iyul oyida e’lon qilingan reytingda esa O‘zbekiston 61-o‘ringa ko‘tarilgan.

FIFA reytingida Argentina milliy jamoasi 1-o‘rinda bormoqda, Fransiya 2-o‘rinda qoldi. Yevropa chempioniga aylangan Ispaniya 8-o‘rindan 3-pog‘onaga ko‘tarildi. Angliya esa 5-o‘rindan 4-o‘ringa chiqqan. Braziliya 5, Belgiya 6-o‘ringa pastlagan. Niderlandiya (7), Portugaliya (8), Kolumbiya (9) va Italiya (10) o‘nlikdan joy olgan.

Osiyo jamoalari top-10lik orasida esa vakillarimiz 8-o‘rindan joy olgan. Yaponiya qit’ada peshqadam sanaladi – 18-o‘rin, Eron (20) va Janubiy Koreya (23) uchlikda. Avstraliya (24), Qatar (34), Iroq (55), Saudiya Arabistoni (56), O‘zbekiston (61), Iordaniya (68) va BAA (69) va joy olgan.

Ma’lumot uchun, O‘zbekiston milliy jamoasining FIFA reytingidagi eng yaxshi natijasi – 45-o‘rin bo‘lib, vakillarimiz 2006-2007 yillarda ushbu o‘rinda qayd etilgandi.