Bayden shu haftada prezidentlik poygasidan chiqishi mumkin - OAV

Bir qancha yuqori martabali demokratlar o‘zaro suhbatlarda partiya yetakchilari va yaqin do‘stlari tomonidan kuchayib borayotgan bosim AQSh prezidenti Jo Baydenni shu haftaning dam olish kunlari prezidentlik poygasidan chiqishga undashi mumkinligini aytmoqda. Bu haqda Axios yozdi.

Ta’kidlanishicha, hozir kovid tufayli o‘zini yakkalab qo‘ygan 81 yoshli prezident ish bilan band. Ammo o‘zaro suhbatlarda u bosimning kuchayishi, so‘rovlardagi salbiy natijalar va adolatsiz tekshiruvlarga tan berganini aytgan, bu esa uning saylovoldi kampaniyasini davom ettirishiga imkon bermayapti, dedi demokratlardan biri nashrga.

Ularning aytishicha, partiyaning yuqori martabali yetakchilari, do‘stlari va asosiy donorlari Bayden g‘alaba qozona olmaydi, yoshi va aqliy qobiliyati haqidagi jamoatchilik fikrini o‘zgartira olmaydi va Kongressda ko‘pchilikni qo‘lga kirita olmaydi, deb hisoblaydi.

«Prezidentga aytilmoqdaki, agar u o‘z lavozimida qolsa, Tramp katta ustunlik bilan g‘alaba qozonib, Bayden merosi va demokratlarning umidlarini yo‘q qilishi mumkin. O‘z nomzodini qaytarib olish uchun Baydenga nisbatan bosim, ayniqsa, so‘nggi bir necha kun ichida chidab bo‘lmas darajada oshib bormoqda… Bosim to‘xtamayapti», deyiladi maqolada.

Demokratlar Respublikachilarning milliy qurultoyidan keyin o‘tkazilgan so‘rovlar katta mag‘lubiyatni ko‘rsatib berishi, amalda Demokratik partiyaning Kongressdagi mag‘lubiyatiga olib kelishi mumkinligidan xavotirda.

«Uning tanlovi - tarix qahramonlaridan biriga aylanish yoki Baydenning prezidentlik kutubxonasi hech qachon bo‘lmasligiga ishonch hosil qilish. U to‘g‘ri yo‘l tutadi deb duo qilaman. U shu yo‘nalishda ketmoqda», degan prezidentning yaqin do‘stlaridan biri.

Demokratlarning Senatdagi yetakchisi Chak Shumer Trampga suiqasd uyushtirilgan kuni Baydenga saylovda qatnashishdan bosh torsa yaxshiroq bo‘lishini aytgan.

Vakillar palatasi sobiq spikeri Nensi Pelosi prezident Jo Baydenga shaxsan qo‘ng‘iroq qilgan. Suhbat davomida u so‘rovlar prezident Donald Trampni mag‘lub eta olmasligini ko‘rsatayotganini aytgan.

Shu bilan birga, Jo Bayden avvalroq saylovlarda ishtirok etishdan bosh tortishi mumkinligini aytgan edi. Agar sog‘lig‘ida jiddiy muammolar yuzaga kelsa, Bayden bu qarorni qabul qilishga tayyor.