"Adolat qaror topdi". IHMA Samarqandda zanjirlangan bola ishi bo‘yicha munosabat bildirdi

Ijtimoiy himoya milliy agentligi direktorining birinchi o‘rinbosari Shahnoza Mirziyoyeva nazoratga olgan voqea bo‘yicha sud hukmi e’lon qilindi.

Foto: Videodan kadr

Shu yilning mart oyida ijtimoiy tarmoqlarda Samarqand shahrida yosh bola avtomashina ichida oyog‘idan zanjirlab qo‘yilgani aks etgan video tarqalgandi.

Jamoatchilikning haqli e’tirozlariga sabab bo‘lgan ushbu holat Ijtimoiy himoya milliy agentligi direktorining birinchi o‘rinbosari Shahnoza Mirziyoyeva tomonidan shaxsiy nazoratga olindi.

Surishtiruvlar davomida jabrlanuvchi Samarqand viloyatining Paxtachi tumanidagi «Qalqon-jasorat» harbiy sport maktabining 6-sinfida o‘qishi, uni g‘ayriqonuniy tarzda kishanlab, avtomashinasida olib yurgan shaxs esa ushbu maktab o‘qituvchisi ekani aniqlangandi.

Shundan so‘ng holat yuzasidan Jinoyat kodeksining 138-moddasi [Zo‘rlik ishlatib g‘ayriqonuniy ravishda ozodlikdan mahrum qilish] bilan jinoyat ishi qo‘zg‘atilib, tergov harakatlari boshlangandi.

Mazkur jinoyat ishi sudda ko‘rib chiqilib, qonunbuzar 4 yil muddatga ozodlikdan mahrum qilindi.

Ijtimoiy himoya milliy agentligi voyaga yetmagan shaxslarga nisbatan zo‘rlik ishlatishni keskin qoralashi hamda bunday holatlarga nisbatan murosasiz ekanini bildirib, jinoyat jazosiz qolmasligini yana bir marta eslatdi.

#zo‘ravonlik #Shahnoza Mirziyoyeva #Samarqand shahri