Toshkent viloyati Favqulodda vaziyatlar boshqarmasi Nurafshon shahridagi ko‘p qavatli uyda sodir bo‘lgan yong‘in to‘g‘risida ma’lumot berdi.

15 iyul kuni soat 01:37 da Nurafshon shahridagi 1-yong‘in qutqaruv qismining dispetcherlik xizmatiga Nurafshon shahar “Yangiobod” mahallasidagi 16 qavatli uyning xonadonlaridan birida yong‘in sodir bo‘lgani haqida xabar kelib tushgan.

Xabarga asosan yong‘in o‘chirish ekipajlari soat 01:44 da yong‘in joyiga yetib borib, alanga soat 02:05 da to‘liq o‘chirilgan.

Talafot oqibatida xonadonning 25 kvadrat metr maydoni zararlangan. Olib borilgan sa’y-harakatlar natijasida xonadonning 50 kvadrat metr maydoni saqlab qolingan.

Yong‘in joyi ko‘zdan kechirilganda xonadonda hech qanday portlash alomatlari yo‘qligi ma’lum bo‘lib, yong‘in kelib chiqishining taxminiy sababi elektr uskunalaridagi nosozlik deb baholanmoqda. Yong‘in oqibatida tan jarohati olgan va halok bo‘lganlar yo‘q.