Birjaga va uning asosiy hisob-kitob tuzilmalari — Milliy kliring markazi va Milliy hisob depozitariysiga nisbatan Amerika sanksiyalari joriy etilgach, Xitoy yuani birja valuta bozorining 99,6 foizini egallab oldi, deyiladi Markaziy bankning iyul oyidagi «Moliya bozorlaridagi risklar sharhi» hisobotida.

Rossiya Ukrainada urush boshlagunga qadar Moskva birjasidagi valuta oldi-sotdilarining atigi 3,5 foizi yuan hissasiga to‘g‘ri kelardi. 2024 yilning boshida bu ko‘rsatkich 50 foizgacha ko‘tarilgan. Endi esa Rossiyaning asosiy savdo maydonchasida yuandan boshqa deyarli hech narsa qolmadi. Bozorning qolgan 0,4 foiz qismini «do‘stona» davlatlarning valutalari egallagan. Ularning orasida Balarus rubli va Qozog‘iston tangasi kabilar bor va ularning kursini Mosbirja bosh sahifasiga joylashtirib qo‘ygan.

Shuningdek, ikki yil avval zararli dollar va yevroga muqobil sifatida ko‘rilgan Turkiya lirasi bilan ham savdolar davom etmoqda, lekin bu savdolar miqyosi shitob bilan tushib bormoqda. Agar o‘tgan yili lira bilan oyiga 50 mlrd rubllik (kuniga 2 mlrd rubl) savdo bo‘lgan bo‘lsa, endi aylanmalar qariyb 100 barobarga tushib ketgan — kuniga 20–30 mln rubl.