Ijtimoiy tarmoqlarda bir nechta shaxslar fuqaroni urayotganligi aks etgan video tarqaldi. Toshkent shahar IIBB holat yuzasidan ma’lum berdi.

Ma’lum qilinishicha, janjal joriy yilning 1 iyul kuni taxminan soat 20:25 larda Yunusobod tumani, Iftixor ko‘chasida sodir bo‘lgan. Oldindan o‘zaro tanish bo‘lgan fuqarolar 1988 yilda tug‘ilgan N.T., 1993 yilda tug‘ilgan S.Q., 1987 yilda tug‘ilgan D.Q., 1995 yilda tug‘ilgan H.Q., 1994 yilda tug‘ilgan J.I. hamda 1997 yilda tug‘ilgan Sh.O. qarz masalasida og‘zaki janjallashib qolishgan. S.Q., D.Q, va H.Q. jamoat tartibini buzgan holda jamiyatda yurish-turish qoidalarini qasddan mensimay, N.T.ni urib tan jarohati yetkazishgan. So‘ng uni o‘zlari kelgan mashinada uyi oldiga olib borishgan.

Jabrlanuvchi shifoxonada birlamchi tibbiy yordam ko‘rsatilganidan so‘ng uyiga ketgan.

Holat yuzasidan Yunusobod tumani IIO FMB huzuridagi Tergov bo‘limi tomonidan Jinoyat kodeksining 277-moddasi (Bezorilik) bilan jinoyat ishi qo‘zg‘atilgan. Gumon qilinuvchilar protsessual tartibda ushlangan. Hozirda tergov ishlari olib borilmoqda.

Oldinroq Toshkentda gul do‘konida janjal uyushtirgan shaxsga jinoyat ishi ochilgandi.