Ijtimoiy tarmoqlarda Urgutdagi bozorda yurgan ota voyaga yetmagan o‘g‘lini tepgani, bola yiqilayotib betonga boshi bilan urilgani tasvirlangan video tarqaldi.

Tuman hokimligi axborot xizmatining ma’lum qilishicha, holat yuzasidan Urgut tumani IIB tomonidan tezkor surishtiruv o‘tkazilgan va bolasini tepib yiqitgan ota topilgan.

Voyaga yetmagan bolaga shafqatsiz munosabatda bo‘lgan shaxs Qashqadaryo viloyati G‘uzor tumani Qovchin mahallasida yashovchi A.F. ekani aniqlangan.

Mazkur shaxs 2024 yil 1 iyul kuni Urgut tumanda joylashgan bozorda xotini va voyaga yetmagan ikki nafar farzandi bilan yurganda 5 yoshli o‘g‘lini oyog‘i bilan tepib yerga yiqitgan.

Bola yiqilib boshi bilan betonga urilgan. Holat savdo kompleksida o‘rnatilgan kuzatuv kameralariga muhrlanib qolgan.

Qayd etilishicha, mazkur holatga huquqni muhofaza qiluvchi organlar tomonidan huquqiy baho berilgandan so‘ng, natijasi keng jamoatchilikka ma’lum qilinadi.

Avvalroq Toshkentda bobo o‘zi bilan sayrga chiqib uzoqqa ketib qolgan bolani urgani tasvirlangan video tarqalgandi. Holat yuzasidan tergovga qadar tekshiruv boshlangan, bolaga yetkazilgan jarohatning darajasini aniqlash yuzasidan sud-tibbiy ekspertiza tayinlangandi.