Ijtimoiy tarmoqlarda bir yigit Buxoro shahrining tarixiy markazi qismida joylashgan Ark qo‘rg‘oniga tirmashib chiqishga uringani haqidagi xabar tarqaldi. Kun.uz holatga oydinlik kiritish maqsadida sud hujjati bilan tanishdi.

Ma’lum bo‘lishicha, holat 2024 yilning mart oyida bo‘lgan. Samarqand shahrida yashovchi, 1995 yilda tug‘ilgan A.A. xorijlik va mahalliy sayyohlar ko‘z oldida Ark qo‘rg‘oni devoriga tirmashib chiqishga uringan

Jinoyat ishlari bo‘yicha Buxoro shahar sudining 2024 yil 27 martdagi qarori bilan yigit Ma’muriy javobgarlik to‘g‘risidagi kodeks 64-1-moddasining 1-qismida nazarda tutilgan huquqbuzarlikni sodir qilganlikda aybli deb topilgan. Unga BHMning 5 baravari (1,7 mln so‘m) miqdorida jarima qo‘llangan.

Eslatib o‘tamiz, Ma’muriy javobgarlik to‘g‘risidagi kodeksning 64-1-moddasida moddiy madaniy meros obektlariga nisbatan hurmatsizlik bilan munosabatda bo‘lish huquqbuzarligi nazarda tutilgan. Unga ko‘ra, moddiy madaniy meros obektlariga nisbatan hurmatsizlik bilan munosabatda bo‘lish, ya’ni yozuvlar yozish, rasmlar chizish yo‘li bilan ularni tahqirlash yoki ularga shikast yetkazish, moddiy madaniy meros obektlarini, shu jumladan ularning tarixiy, ilmiy, badiiy yoxud o‘zgacha madaniy qimmatiga dog‘ tushiruvchi yoki ularni masxara qiluvchi harakatlarni sodir etish, xuddi shuningdek, moddiy madaniy meros obektlariga nisbatan jamoat tartibini buzuvchi harakatlarni sodir etish BHMning 5 baravaridan 10 baravarigacha miqdorda jarima solishga sabab bo‘ladi.