«Vagner» XHK asoschisi Yevgeniy Prigojin bilan aloqador bo‘lgan «Patriot» media-holdingining sobiq top-menejeri Ilya Gorbunov va «Konkretno.ru» bosh muharriri Kirill Metelev Sankt-Peterburgda qo‘lga olindi. Bu haqda 23 iyun, yakshanba kuni Rossiya OAV huquq-tartibot idoralaridagi manbalariga tayanib xabar berdi. «Izvestiya» gazetasi suhbatdoshi ularning ushlanishi Prigojinga hech qanday aloqasi yo‘qligini ta’kidladi. Bundan tashqari, manbaning aniqlik kiritishicha, Gorbunov hibsda saqlanmoqda.
«Fontanka»ning yozishicha, Gorbunov va Metelev tovlamachilikda ayblanmoqda. Tergov ma’lumotlariga ko‘ra, media-menejerlar «Sankt-Peterburg» telekanalining sobiq bosh direktori Aleksandr Malkevichdan pul undirishgan. U Sankt-Peterburg gubernatorining maxsus vakili lavozimini egallaydi.
Gorbunov chet el valutasi bilan firibgarlik ishi bo‘yicha gumonlanuvchi sifatida qo‘lga olindi, deb xabar beradi 78.ru.
Gorbunov, Metelin va Malkevich Prigojin uchun ishlagan
Ilya Gorbunov «Komsomolskaya pravda» va RIA «Novosti» agentligida ishlagan. 2019 yilda u «Patriot» media-guruhini boshqargan, 2020 yilda esa Prigojin media-imperiyasining «trollar fabrikasi» va Telegram-kanallarini boshqarishga o‘tgan.
«Konkretno.ru» nashri bosh muharriri Kirill Metelev «Operativnoye prikrytiye» xususiy qo‘riqlash korxonalari jurnalining hammuassisi va «Versiya v Pitere» gazetasining noshiri edi. «Fontanka» ma’lumotlariga ko‘ra, u Prigojin bilan bog‘liq loyihalarda ishtirok etgan bo‘lishi mumkin.
Malkevich 2020-2023 yillarda «Sankt-Peterburg» telekanalini boshqargan. Bungacha u Prigojinning «Patriot» media-guruhi tarkibiga kiruvchi «Federalnoye agenstvo novostey» shu’ba loyihasi - USA Really saytini boshqargan. Ukrainada urush boshlanganidan keyin Malkevich egallab olingan hududlarda telekanallar yaratishda faol ishtirok etdi.
