Farg‘ona viloyati Oltiariq tumani hokimi Shamsiddin Turdialiyev boshchiligidagi delegatsiya amaliy tashrif bilan Polshada bo‘ldi, deb xabar qilmoqda "Dunyo".

Tashrif davomida Polsha rasmiy doira vakillari, ishbilarmonlar, yirik korxona egalari bilan muzokaralar o‘tkazildi. O‘zbekiston-Polsha tadbirkorlari uyushmasi bilan birgalikda ikki mamlakat tadbirkorlari ishtirokida davra suhbati tashkil etildi. Unda Oltiariq tumani vakillari tomonidan hududning savdo-iqtisodiy va investitsiyaviy salohiyati bo‘yicha taqdimot qilindi.

Tadbir yakunida ikki davlat tadbirkorlari o‘rtasida V2V uchrashuvlar o‘tkazildi. Unda 15 million AQSh dollarga teng qishloq xo‘jaligi, to‘qimachilik va tekstil mahsulotlarini yetkazib berish bo‘yicha kelishuvlarga erishildi.

Polsha – Osiyo savdo palatasi prezidenti Yanush Pixochinski bilan kechgan muloqotda O‘zbekistonga xorijiy investitsiyalarni jalb etishni kuchaytirish, qo‘shma loyihalarni ishlab chiqish va hayotga tatbiq etish istiqbollari ko‘rib chiqildi.

Varshava shahridagi qishloq xo‘jaligi mahsulotlarini Yevropa davlatlari bo‘ylab yetkazib beruvchi EWA-BIS MChJ rahbari Marek Marzes bilan uchrashuvda esa Farg‘ona viloyati va Oltiariq tumanida yetishtirilgan qishloq xo‘jalik mahsulotlarini Polsha orqali Yevropa bozorlariga sotishga to‘g‘risidagi kelishuvga erishildi.