Jizzaxda prokuror, Toshkentda tergovchi va Namanganda advokat pora olayotganda ushlandi

Jamiyat 10:45 / 12.06.2024 9567

DXX respublikaning turli hududlarida korrupsion holatlarga chek qo‘ydi

Ma’lum qilinishicha, Jizzax viloyati prokuraturasining bo‘lim prokurori Jizzax shahrida yashovchi, 1975 yilda tug‘ilgan fuqaroga muqaddam Jinoyat kodeksining 167-moddasi bilan sudlanganlik holatini o‘zining vakolatli hamkasbi tomonidan olib tashlashni va’da qilgan. U ushbu “xizmati” uchun 1000 AQSh dollari hamda Samsung S 24 Ultra telefonini olgan vaqtida ashyoviy dalillar bilan ushlangan.

Toshkent shahrida o‘tkazilgan tezkor tadirda Yakkasaroy tumani ichki ishlar organlari faoliyatini muvofiqlashtirish boshqarmasi huzuridagi Tergov bo‘limi tergovchisi hamda ikki nafar surishtiruvchisi ashyoviy dalillar bilan qo‘lga olingan. Ular o‘zaro til biriktirib, bo‘lim ish yurituvida bo‘lgan jinoyat ishi bo‘yicha ayblanuvchiga nisbatan qamoqqa olish tarzidagi ehtiyot chorasini qo‘llamaslik hamda uning harakatlarini Jinoyat kodeksining 273-moddasi 5-qismidan 276-moddasi 2-qismi “a” bandiga qayta malakash evaziga 7 ming AQSh dollari olishgan.

Boshqa holatda esa poytaxtda istiqomat qiluvchi ikki shaxs 1980 yilda tug‘ilgan fuqaroning ishonchiga kirib, unga nisbatan IIV huzuridagi Tergov departamenti ish yurituvidagi Jinoyat kodeksining 168-moddasi bilan qo‘zg‘atilgan jinoyat ishini prokuratura organlaridagi tanishlari orqali uning foydasiga ijobiy hal qilib berish va qamoqqa olish tarzidagi ehtiyot chorasini qo‘llamaslik evaziga 50 ming AQSh dollari talab qilishgan. DXX xodimlari tomonidan Mirobod tumanida o‘tkazilgan tezkor tadbirda firibgarlardan biri so‘ralgan pul mablag‘ini olgan vaqtida ushlangan. Hozirda ularning prokuratura tizimidagi tanishlarining shaxsiga aniqlik kiritish bo‘yicha zarur tadbirlar amalga oshirilmoqda.

Namangan shahridagi advokatlar hay’ati advokati viloyat IIB boshqarmasi tomonidan Jinoyat kodeksining 168 va boshqa moddalari bilan qo‘zg‘atilib, hozirda Namangan shahar sudida ko‘rilayotgan jinoyat ishi bo‘yicha ayblanuvchiga nisbatan sud organlaridagi tanishlari orqali ozodlikdan mahrum qilish bilan bog‘liq bo‘lmagan jazo tayinlanishiga yordam berishni va’da qilgan. U buning evaziga 10 ming AQSh dollari talab qilib, shundan 8 ming AQSh dollarini olayotganda ushlangan. Qayd etilishicha, mazkur advokat muqaddam Jinoyat kodeksining 25, 97-moddasi bilan sudlangan shaxs hisoblanadi.

Hozirda mazkur shaxslarning barchasiga nisbatan Jinoyat kodeksining tegishli moddalari bilan jinoyat ishlari qo‘zg‘atilib, qamoq ehtiyot chorasi qo‘llanilgan. 

Avvalroq Davlat xavfsizlik xizmati tomonidan Qashqadaryo va Buxoro viloyatlari hamda Toshkent shahrida soliq xodimlarining noqonuniy harakatlariga chek qo‘yilgani xabar qilingandi.

Ko‘proq yangiliklar: