Britaniyaning Financial Times (FT) gazetasiga ko‘ra, Mustafo Nayyemning Ukraina tiklanish agentligi rahbari lavozimidan ketishi G‘arbning Ukraina hukumati va prezident Volodimir Zelenskiyga bo‘lgan ishonchiga putur yetkazuvchi Kiyevdagi qator kadr o‘zgarishlari oxirgisi hisoblanadi. «AQSh va boshqa G‘arb hamkorlari ukrainalik hamkasblari bilan normal, oldindan taxmin qilib bo‘ladigan munosabatlarni istaydi», dedi FT telekanaliga 10 iyun, dushanba kuni ismini oshkor qilmaslik sharti bilan Ukraina hukumati rasmiysi.
Uning so‘zlariga ko‘ra, «hozir ular tushunmagan kadrlar qarorlari tufayli Ukraina hukumatiga ishonchini yo‘qotmoqda». Jami olti nafar ukrain va g‘arb mulozimining FT telekanaliga aytishicha, so‘nggi oylarda Ukraina hukumatidagi qator ishdan bo‘shatishlar, iste’folar va o‘zgarishlar Kiyev va Ukraina mudofaasi hamda tiklanishini moliyalashtirayotgan g‘arbiy hamkorlar o‘rtasida nizolarga sabab bo‘lgan.
Nayyem va Kubrakovning iste’fosi
Bundan tashqari, Financial Times suhbatdoshlari Zelenskiy va hukumatni kadrlar o‘zgarishini buzg‘unchi va tushunarsiz harakatlar deb bilishlari haqida ogohlantirganliklarini ta’kidladi. Gap Mustafo Nayyemdan tashqari, birinchi navbatda, bosh vazirning qayta qurish bo‘yicha o‘rinbosari, jamoat, hududlar va infratuzilmani rivojlantirish vaziri Aleksandr Kubrakovning iste’foga chiqishi haqida ketmoqda, uni ishdan bo‘shatish uchun Oliy rada may oyi boshida ovoz bergan. Ularning ketishi Ukrainadagi hamkorlarga tiklanish endi ustuvor vazifa emasligidan dalolat beradi, dedi Kiyevdagi Iqtisodiy strategiya markazi ijrochi direktori Gleb Vishlinskiy FT nashriga.
Ukraina tiklanish agentligi rahbari Mustafo Nayyem Berlinda Ukrainani qayta tiklash bo‘yicha konferensiya boshlanishi arafasida iste’foga chiqdi. U o‘z qaroriga hukumat bilan kelishmovchiliklar sabab bo‘lganini aytdi. «Men o‘z vakolatlarimni samarali bajarish uchun keyingi imkoniyatlarga to‘sqinlik qilayotgan tizimli muammolar tufayli shunday qaror qabul qildim», — deb yozdi u Facebook’da. Nayyemning so‘zlariga ko‘ra, uning jamoasi 2023 yil noyabr oyidan beri «doimiy qarshilik va sun’iy to‘siqlarlarga» duch kelgan.
Boshqa narsalar qatorida, u yo‘llarni qayta tiklash va ta’mirlash loyihalari uchun budjetlar bekor qilinishiga ishora qildi. «Men cheklangan resurslarni va harbiy xarajatlarning ahamiyatini tushunaman, ammo infratuzilmani saqlash uchun mablag‘lar bekor qilinishi, birinchi navbatda, mudofaa yo‘llari holatiga ta’sir qiladi, agar bu bo‘lmasa kelasi mavsumda biz harbiy logistika va mahsulot eksporti bilan bog‘liq qiyinchiliklarga duch kelamiz», dedi u. Bundan tashqari, Nayyem Ukraina bosh vaziri Denis Shmixalni tanqid qildi, u Berlinda Ukrainani qayta tiklash bo‘yicha konferensiyaga borish imkoniyatini rad etgan.
Berlin Nayyemning iste’foga chiqishini vazminlik bilan izohladi
Germaniya hukumati vakili Shteffen Xebeshtraytning ta’kidlashicha, Nayyem iste’fosi Berlinda bo‘lib o‘tadigan konferensiya jarayoniga jiddiy ta’sir ko‘rsatmaydi. 11-12 iyun kunlari Germaniya poytaxtida Ukrainani tiklash bo‘yicha ikki kunlik konferensiya bo‘lib o‘tadi, unda 2 mingga yaqin ishtirokchi kutilmoqda.
Ukrainada sobiq jurnalist Mustafo Nayyem 2013 yil oxirida keng tanildi: Qadr-qimmat inqilobi odamlarni Ukrainadagi Maydanga borishga chaqirgan uning tvitidan boshlandi. Keyinchalik u Oliy rada deputati bo‘ldi, 2023 yil boshidan esa Tiklanish agentligini boshqargan.
