Amerikaning Apple texnologik korporatsiyasi sun’iy intellekt (SI)ni smartfon va boshqa qurilmalarning ajralmas qismiga aylantirmoqchi. Apple 10 iyun, dushanba kuni Kaliforniyaning Kupertino shahridagi shtab-kvartirasida bo‘lib o‘tgan Worldwide Developers Conference (WWDC 2024) ishlab chiquvchilar konferensiyasida Apple Intelligence (AI) sun’iy intellekt tizimini yaratish uchun SI sohasidagi yetakchilardan biri - OpenAI bilan hamkorlik qilishi to‘g‘risida ma’lumot berdi.
Tadbirda Apple qurilmalari uchun operatsion tizimlarning yangi versiyalari – iOS 18, iPad OS 18 va MacOS Sequoia’ga integratsiyalashuvi kutilayotgan SIga asoslangan funksiyalar to‘plami namoyish etildi. OpenAI bilan hamkorlik doirasida kompaniyaning talab bo‘yicha matn, tasvir va boshqa kontent yaratishga qodir ChatGPT chat-boti iPhone, iPad va boshqa Apple qurilmalariga o‘rnatiladi.
Ayfonlarning yangi funksiyalari va imkoniyatlari
Xususan, Apple Intelligence matnni avtomatik tuzish, ilovalar bo‘yicha ma’lumotlarni umumlashtirish, elektron pochta xabarlarini olish va maxsus emodzilar yaratish imkoniyatiga ega bo‘ladi. Boshqa narsalar qatorida, Siri ovozli yordamchisi SI funksiyalari yordamida butunlay qayta ishlab chiqiladi. Shu bilan birga, ma’lumotlarni himoya qilish mexanizmlari Apple Intelligence’ga integratsiya qilinadi. Maxfiylikni ta’minlash maqsadida barcha ma’lumotlar qurilmalarning o‘zida qayta ishlanadi, deya xabar berilgan qo‘shimcha ravishda.
OpenAI bosh direktori Sem Altmanning aytishicha, kompaniya «bu yil o‘z qurilmalariga ChatGPT’ni integratsiya etish uchun Apple bilan hamkorlik qilishdan xursand bo‘ladi». O‘z navbatida, Apple bosh direktori Tim Kuk sun’iy intellekt sohasidagi so‘nggi ishlanmalar foydalanuvchilarning Apple mahsulotlari bilan ishlash tajribasini «yangi cho‘qqilarga» ko‘tarishini va SI funksiyalari kelajakda ajralmas bo‘lib qolishini ta’kidladi. Shu paytgacha uning korporatsiyasi SIdan foydalanish bo‘yicha raqobatchilardan, xususan, Google va Microsoft’dan sezilarli darajada ortda qolib ketgan.
Mask ma’lumotlar xavfsizligiga tahdid haqida ma’lum qildi
Shu bilan birga, Apple rejalari amerikalik tadbirkor Ilon Mask tomonidan qattiq tanqid qilindi, u 2015 yilda OpenAI asoschilaridan biri bo‘lgan, biroq uch yildan so‘ng kompaniyani tark etgan va keyinchalik tijorat yo‘nalishi tufayli unga qarshi da’vo arizasi bergan. Mask so‘zlariga ko‘ra, u ma’lumotlar xavfsizligiga tahdid tufayli iPhone’ni o‘z kompaniyalarida taqiqlaydi. «Apple sizning ma’lumotlaringizni OpenAI’ga ishonsa, nimalar bo‘lishi mumkinligini hatto tasavvur ham qila olmaydi», deb yozgan u.
Shu bilan birga, 2024 yil may oyida YeI sun’iy intellektdan foydalanish qoidalarini kuchaytirdi.
