Ikki belarus va bir polyak Polsha ichki xavfsizlik agentligi tomonidan Rossiya harbiy razvedkasi – Rossiya Qurolli kuchlari Bosh shtabi Bosh boshqarmasi (sobiq "GRU") ko‘rsatmasi bo‘yicha mamlakatda qo‘poruvchilik aktlarini tayyorlashda gumon qilinib ushlandi. Bu haqda Polshaning Rzeczpospolita gazetasi 29 may, chorshanba kuni o‘z saytida ma’lum qildi.
Ta’kidlanishicha, Polsha razvedka xizmatlariga ko‘ra, erkaklar savdo markazlari, restoranlar va qurilish omborlariga o‘t qo‘yishni rejalashtirgan va bunga urinib ko‘rgan. Yanvar oyida Polshada ukrainalik qo‘lga olindi, prokuratura ma’lumotlariga ko‘ra, u ham Rossiya tomonidan yollangan va Vrotslavdagi bir qator obektlarga, xususan, bo‘yoq ishlab chiqarish zavodiga o‘t qo‘yishni rejalashtirgan, deya eslatadi nashr.Oxirgi qo‘lga olishlar - bir polyak va ikki belarus ushlanishi - xuddi shu tergov doirasida amalga oshirildi. Qo‘lga olishlardan biri belaruslardan biri yashagan Pruskov shahrida, qolganlari Varshavada bo‘lib o‘tdi.
Mukofot puli evaziga o‘t qo‘yish
Jurnalistlarning ta’kidlashicha, 10 ming yevro mukofot evaziga gumonlanuvchilar Gdanskdagi obekt va Varshava chekkasidagi ikkita obektga o‘t qo‘yishga uringan. Ushlangan belaruslardan biri 37 yoshda, ikkinchisi 35 yoshda. Erkaklardan birida Polsha xalqiga tegishli ekanligini tasdiqlovchi hujjat bo‘lgan. Uchinchi gumonlanuvchi polyak 40 yoshda. Pomeraniya provinsiyasida (voyevodaligi) yashagan.
Rzeczpospolita tergovdagi manbalarga tayanib yozganidek, rejalashtirilgan diversiyaning maqsadi «tartibsizlik, qo‘rquvni keltirib chiqarish» edi.
Xorijiy razvedka xizmatlari ko‘rsatmasi bo‘yicha Polsha Respublikasiga qarshi harakatlarni amalga oshirish maqsadida uyushgan jinoiy guruhda ishtirok etish moddasi bo‘yicha ikki belarus va bir polyakka nisbatan ish ochildi. Ularni umrbod qamoq jazosi kutmoqda.
NYT: AQSh Rossiya bilan bog‘liq diversiyalar sonining ko‘payishini qayd etmoqda
Avvalroq, 26 may kuni The New York Times gazetasi AQSh razvedka idoralari Yevropada Rossiya bilan bog‘langan qo‘poruvchilik operatsiyalari sonining ko‘payishini qayd etayotgani haqida yozgan edi. G‘arb razvedka agentliklariga ko‘ra, bu amaliyotlar Rossiya hujumini qaytarishda Ukrainaga yordamga putur yetkazishga qaratilgan kampaniyaning bir qismi bo‘lishi mumkin, deb yozadi nashr.
Asosan, nashrga ko‘ra, Rossiya maxsus xizmatlari ko‘rsatmasi bilan turli obektlarda o‘t qo‘yish sodir etilgan. Ular orasida Angliyadagi omborxona, Polshadagi bo‘yoq zavodi, Latviyadagi uylar va Litvada IKEA mebel do‘koni bor. Shu bilan birga, Rossiya Federatsiyasiga ishlaganlikda gumon qilinganlar Amerika harbiy bazalariga ham hujumlar rejalashtirishi mumkin, deyiladi tergovda.
