Kreml Rossiya prezidenti Vladimir Putinning KXDRga rasmiy tashrifi haqida e’lon qildi. «Tashrifga tayyorgarlik ko‘rilmoqda. Biz bunday safar sanalarini o‘z vaqtida ma’lum qilamiz», — dedi davlat rahbari matbuot kotibi Dmitriy Peskov (RIA «Novosti» iqtibos keltirgan). 

Uning eslatishicha, Putinda Shimoliy Koreyaga rasmiy tashrif bilan borish uchun amaldagi taklif bor.

Shimoliy Koreya yetakchisi Kim Chen In 2023 yil sentabrida Rossiyaga tashrif buyurgan edi. U «Vostochniy» kosmodromida, Komsomolsk-Amurda, Primore va Vladivostokdagi Knevichi aerodromida bo‘ldi. Shu bilan birga, KXDR rahbari Putinni Pxenyanga tashrif buyurishni taklif qildi.

Putin avvalroq 2000 yilda Shimoliy Koreyaga tashrif buyurgan edi.

Amerikaning NBC telekanali xabariga ko‘ra, Putin yaqin haftalarda Shimoliy Koreyaga tashrif buyuradi. Amerikaning yuqori martabali mulozimlari telekanalga Rossiya prezidenti va KXDR yetakchisi o‘rtasidagi muzokaralar chog‘ida Pxenyanga o‘q-dorilar yetkazib berish evaziga yadroviy suvosti kemalari texnologiyasi, ballistik raketalar, samolyotlar va zirhli texnikalar topshirish haqidagi masala ko‘tarilishini aytishdi.

AQSh rasmiylari Rossiya Shimoliy Koreyaga yetkazib berayotgan texnologiyalar turlari haqida aniq tushunchaga ega emasligini tan oldi. «Rossiyaga yuqori sifatli texnik yordam, albatta, kuzatish juda qiyin bo‘lgan shakllarda taqdim etiladi», dedi Oq uyning yuqori martabali mulozimi.