Fransiyada mahbusni olib ketayotgan furgonga hujum: ikki qo‘riqchi halok bo‘ldi

Jahon 10:36 / 15.05.2024 3961

14 may, seshanba kuni Fransiya shimolidagi Er departamenti Ruan shahridan mahbusni olib ketayotganda qamoqxona yuk mashinasiga qurolli hujum uyushtirilgani oqibatida ikki qamoqxona xodimi halok bo‘ldi. Fransiya rasmiylariga ko‘ra, qo‘sh qotillik mahalliy vaqt bilan soat 11:00 lar atrofida Normandiya yo‘lidagi pul to‘lash joyi yaqinida sodir bo‘lgan.

Furgonga bir necha kishi o‘qotar qurollar bilan hujum qilgan, mahbus va noma’lum shaxslar qochishga muvaffaq bo‘lgan. Rasmiylarning aytishicha, hujumchilar Audi va BMW avtomobillarida bo‘lgan. Hujum sodir bo‘lganidan ko‘p o‘tmay yoqib yuborilgan mashinalardan biri topilgan, uning topilgan joyi aniqlashtirilmagan.

Le Figaro gazetasining politsiyadagi manbasi dastlab uch nafar zobit o‘lganini xabar qildi, keyinroq rasmiylar ikki qurbon bo‘lganini aniqlashtirdi. Fransiya adliya vaziri Erik Dyupon-Morettining aytishicha, yana uch kishi jiddiy jarohat olgan. «Mening barcha o‘y-xayollarim qurbonlar, ularning oilalari va hamkasblari bilan», deb yozdi u X ijtimoiy tarmog‘ida. Tergovchilar fikricha, qurbonlardan biri o‘ta og‘ir ahvolda. Shuningdek, hujumchilardan biri yaralangani xabar qilinmoqda. 

Fransiya prezidenti hujumga munosabat bildirdi

«Qamoqxona xodimlarining o‘limiga sabab bo‘lgan bugungi hujum barchamizni hayratda qoldirdi», — deya yozdi Fransiya prezidenti Emmanuel Makron X ijtimoiy tarmog‘ida. «Jinoyatchilarni qo‘lga olish kerak», — deya qo‘shimcha qildi Fransiya rahbari. 

BFM TV telekanaliga ko‘ra, qochgan mahbus 30 yoshda. Bir necha kun oldin u Evryo chekkasidagi supermarket va do‘konlardan bir qator o‘g‘irliklar sodir etgani uchun 18 oylik qamoq jazosiga hukm qilingan edi. Erkak, shuningdek, Sent-Eten-dyu-Ruvre shahrida qotillikka urinishda va 2022 yil iyun oyida Marselda qasddan odam o‘ldirishda ayblanmoqda.

Adliya vazirligi rahbari hujumdan so‘ng darhol tezkor guruh yig‘di. Fransiya ichki ishlar vaziri Jyerald Darmanen bir necha yuzlab politsiyachini safarbar qilishga buyruq berdi. 200 ga yaqin politsiyachi qochib ketganlarni qidirishda ishtirok etmoqda, deya aniqlik kiritdi AFP agentligi. 

Ko‘proq yangiliklar: