AQSh Deripaskaga qarshi sanksiyalarni chetlab o‘tishga urinishlar uchun sanksiyalar kiritdi

Jahon 10:10 / 15.05.2024 1544

AQSh Moliya vazirligi Rossiya fuqarosi va rossiyalik tadbirkor Oleg Deripaskaning 1,5 milliard dollardan ortiq aktivlarini blokdan chiqarishda yordam berishi kerak bo‘lgan Rossiyada joylashgan uchta kompaniyaga nisbatan sanksiyalar joriy qildi. Bu haqda 14 may, seshanba kuni idoraning o‘zi ma’lumot berdi.

AQSh Moliya vazirligi ma’lumotlariga ko‘ra, 2023 yil iyun oyida Deripaska Rossiya fuqarosi, «Titul» MChJ egasi Dmitriy Beloglazov bilan oligarxning nomi oshkor etilmagan Yevropa kompaniyasidagi ulushlarini sotish bo‘yicha bitim bo‘yicha kelishib olgan. Shu maqsadda «Iliadis» AJ «Titul»ning shu’ba korxonasi sifatida tashkil etilgan. 2024 yil boshida «Iliadis» Deripaska aksiyalariga egalik qiluvchi Rossiyaning «Rasperia Treyding Limited» kompaniyasini sotib oldi.

Moliya vazirligi qaroriga ko‘ra, ro‘yxatga olingan jismoniy va yuridik shaxslarning AQShdagi barcha mol-mulki va aktivlari bloklanadi. Xuddi shu narsa to‘g‘ridan to‘g‘ri yoki bilvosita kamida 50 foiz ulushga ega bo‘lgan tashkilotlarga ham tegishli. Bundan tashqari, sanksiyalar ro‘yxatiga kiritilgan shaxslarga AQShda yoki Qo‘shma Shtatlar orqali har qanday iqtisodiy operatsiyalarni amalga oshirish taqiqlanadi. 

AQSh sanksiyalari va Deripaska

Vashington 2018 yilda rossiyalik oligarxni Rossiya rasmiylari manfaatlarini himoya qilish, Rossiya prezidenti Vladimir Putinning aktivlariga egalik qilish va pul yuvishda ayblab, Oleg Deripaskaga nisbatan jazo choralarini joriy qilgan edi. Deripaska AQShdagi saylovlarga aralashishda ham gumon qilingan.

2022 yil sentabrida AQSh Adliya vazirligi Deripaskani sanksiyalar rejimini buzganlikda aybladi, bu jinoyat hisoblanadi. Ayblovga ko‘ra, oligarx AQShda mulkdan foydalangan, uning sevgilisi esa ikki marta AQShga farzandlarini dunyoga keltirish uchun kelgan.

2023 yil avgust oyida Nyu-Yorkdagi Federal tergov byurosi (FTB) kontrrazvedka bo‘limining sobiq rahbari Charlz Makgonigal iste’foga chiqqanidan keyin Deripaska uchun ishlaganini va AQShning tadbirkorga nisbatan qo‘ygan sanksiyalarini buzish harakatida qatnashganini tan oldi. 

Oleg Deripaska - Rossiyadagi eng boy odamlardan biri. Forbes jurnali uning boyligini 2,5 milliard dollarga baholagan. Deripaska unga nisbatan qo‘llangan cheklov choralaridan ko‘rilgan zararni 7,5 milliard dollarga baholagan. U o‘ziga qo‘yilgan ayblovlarni rad etadi va AQSh sanksiyalari ro‘yxatiga kiritilishiga qarshi sudga shikoyat qilgan. 

Ko‘proq yangiliklar: