Mumbayda shamol tufayli ulkan bilbord quladi. 14 kishi halok bo‘lgan

Jahon 15:24 / 14.05.2024 7350

13 may kuni Mumbayning Gatkopar tumanida 70 ga 50 metr hajmidagi bilbord turar joy binosi va yonilg‘i quyish stansiyasi ustiga qulab tushgan, bu vaqtda shaharga kuchli yomg‘ir va qum bo‘roni yopirilgandi.

BBC News xabariga ko‘ra, kuchli shamol daraxtlarni ildizidan qo‘porib tashlab, yo‘llarda tartibsizlik yuzaga keltirgan, elektr ta’minotida uzilishlar kelib chiqqan.

Voqea joyida olingan kadrlarda reklama konstruksiyasi shamol ta’sirida silkingani, keyin esa qurilish, odamlar va stansiyada turgan mashinalar ustiga qulagani aks etgan.

Rasmiylar xabariga ko‘ra, qutqaruv amaliyotiga politsiyachilar, o‘t o‘chiruvchilar va tabiiy ofatlar oqibatlarini bartaraf etish bo‘yicha jamoalar jalb etilgan.

Mahalliy rasmiylar bilbord hajmi ruxsat berilganidan bir necha bor katta ekani va reklama agentligi uni noqonuniy o‘rnatganini ma’lum qilgan. Kompaniya shahardagi shu kabi barcha reklama taxtalarini olib tashlash va konstruksiyalarni demontaj qilish bo‘yicha ko‘rsatma olgan.

Times of India nashri aniqlik kiritishicha, kompaniya tegishli organlar ruxsatini olmasdan jami sakkizta reklama lavhasi o‘rnatgan. Qulab tushgan konstruksiya vazni 250 tonnani tashkil etgan.

Ko‘proq yangiliklar: