Mamlakat elchixonasi ko‘magida O‘zbekiston sog‘liqni saqlash vazirining birinchi o‘rinbosari vazifasini vaqtincha bajaruvchi Davron Sultonov boshchiligidagi delegatsiyaning Shvetsiyaga tashrifi tashkil etildi, deb xabar qilmoqda "Dunyo".

Tashrif doirasida Shvetsiya Sog‘liqni saqlash vazirligi davlat kotibi, Swecare, E-health, Medical Producs agentliklari, Karolinska tibbiyot instituti, Solgrenska universiteti va Qirolicha Silviya nomidagi bolalar kasalxonasi, Luleo texnologiya universiteti, AstraZeneca, Elekta va Getinge kompaniyalari rahbariyati bilan uchrashuvlar o‘tkazildi.

Muzokaralar davomida shved tomoniga O‘zbekistonda sog‘liqni saqlash tizimining bugungi kundagi rivojlanish bosqichi va istiqboldagi rejalar to‘g‘risida ma’lumot berildi. Bundan tashqari, respublikada farmatsevtika sanoatini rivojlantirish uchun yaratilgan imkoniyatlar va Toshkent tibbiyot akademiyasi salohiyati to‘g‘risida alohida taqdimot o‘tkazildi.

Uchrashuvlar natijasida, O‘zbekiston va Shvetsiya o‘rtasida onkologiya, yurak-qon tomir kasalliklari va chaqaloqlarda tug‘ma nuqsonlarni davolashda zamonaviy usullar va texnologiyalarni joriy qilish, sog‘liqni saqlash va farmatsevtika tarmog‘ini raqamlashtirish yo‘nalishlarida hamkorlikni yo‘lga qo‘yish bo‘yicha muhim kelishuvlarga erishildi.