Botir Qodirov va Jo‘rayevlarga oid sud ishi yopiq tarzda ko‘rib chiqiladi. Bu haqda Kun.uz manbasi xabar bermoqda.
Bugun, 2024 yil 2 may kuni Toshkent shahri Uchtepa tumanlararo sudida xonanda Botir Qodirovning otalikni belgilash haqidagi da’vosi yuzasidan navbatdagi sud majlisi bo‘lib o‘tgan.
Unda sudya aka-uka Jo‘rayevlar vakilining ishni unda ishtirok etuvchi shaxslarning hayotiga taalluqli bo‘lgan ma’lumotlarning oshkor bo‘lishiga yo‘l qo‘ymaslik uchun yopiq sud majlisida ko‘rib chiqish haqida kiritgan iltimosnomasi qanoatlantirilganini va Fuqarolik protsessual kodeksining 12-moddasiga asosan Botir Qodirovning da’vosi bo‘yicha o‘tkaziladigan sud majlislari yopiq tarzda bo‘lib o‘tishini ma’lum qilgan.
Toshkent shahar sudining Kun.uz'ga ma’lum qilishicha, Botir Qodirovning da’vo arizasi sudga 2024 yilning 19 mart kuni kelib tushgan. Ishni ko‘rish 15 aprelga belgilangan. Javobgar vakili ish bilan tanishish uchun ishni ko‘rishni boshqa kunga qoldirishni so‘ragani sababli navbatdagi sud majlisi 23 aprelga qoldirilgan.
23 aprel, seshanba kungi sud majlisida da’vogar vakilining ko‘rsatmasi eshitilib, guvohlarni ishga jalb etish va qo‘shimcha dalillarni (fotosuratlar, dalolatnoma yozuvi va tug‘ilganlik haqidagi guvohnomaning asl nusxasini) talab qilib olish uchun ishni ko‘rish 2 mayga qoldirilgandi.
Da’vo arizaga Adliya vazirligi huzuridagi Hadicha Sulaymonova nomidagi Respublika sud ekspertiza markazi mutaxassisining 2023 yil 29 sentabridagi fikri ilova qilingan. Ilovada Halimjon Nurmatov va Qodirov Botir Sheraliyevichning amaki-jiyan ekani bo‘yicha fikr berilgan.
Yangiyo‘l tumani FHDYo bo‘limi tomonidan 2008 yil 26 fevral kuni familiyasini “Jo‘rayev”dan “Qodirov”ga, otasining ismini “Sherali o‘g‘li”dan “Sheraliyevich”ga o‘zgartirgani haqidagi 46- va 48-sonli ilovalar sudga taqdim etilgan.
