Andijon viloyatining Andijon tumaniga yangi hokim tayinlandi. Bu haqda viloyat hokimligi xabar bermoqda.

To‘rt yildan buyon Marhamat tumani rahbari bo‘lgan Bobur Yo‘ldoshev Andijon tumani hokim lavozimida ish boshladi.

Boburbek Yo‘ldoshev 1986 yili Andijon shahrida tug‘ilgan. 2008 yili Andijon muhandislik iqtisodiyot institutini tamomlagan. 

Mehnat faoliyati davomida statistika, iqtisodiyot, axborot-tahlil va bir qancha sohalarda mutaxassis, boshliq o‘rinbosari, bo‘lim boshlig‘i hamda O‘zbekiston prezidenti administratsiyasi Mahalliy davlat hokimiyati organlari bilan ishlash shu’basi bosh inspektori lavozimlarida ishlagan. 

Bobur Yo‘ldoshev Marhamat tumaniga 2020 yil mayidan buyon hokimlik qilib kelayotgandi. U 2022 yil fevralida tumandagi o‘qituvchilarni ota-onalar majlisida uzr so‘rashga majbur qilgani bilan mashhur bo‘lgandi.

U endi 2022 yil dekabridan buyon Andijon tumaniga hokimlik qilib kelgan Baxtiyor Mamatkarimov o‘rnini egalladi.

• Bundan oldin Buloqboshi va Marhamat tumanlariga yangi rahbarlar tayinlangandi. Xususan, Buloqboshi tumaniga 7 yil hokimlik qilgan O‘tkirbek Ma’murov Marhamat tumani hokimi lavozimiga o‘tkazildi. Buloqboshi tumaniga Furqatbek Bo‘taxonov yangi hokim bo‘ldi. U ushbu tuman hokimining birinchi o‘rinbosari lavozimida faoliyat yuritib kelayotgan edi.