«Agrobank» Oltinsoy filiali boshqaruvchisi xizmat avtomobilida YTHga uchradi

Ijtimoiy tarmoqlarda Surxondaryo viloyati tumanlarining birida «Agrobank» boshlig‘i bankka olingan yangi Onix avtomobilini mast holda boshqarib, avariyaga uchragani to‘g‘risida xabar tarqaldi. «Agrobank» matbuot xizmati holat bo‘yicha rasmiy ma’lumot berdi.

Foto: Videodan kadr

Aniqlanishicha, bankning Oltinsoy filiali boshqaruvchisi, 1989 yilda tug‘ilgan A.Ya. filialga tegishli bo‘lgan davlat raqami belgisi 75 747 ZAA oq rangli Chevrolet Onix avtomobilini 18 aprel kuni kech soat 23:00 lar atrofida boshqarib ketayotganida yo‘l-transport hodisasiga uchragan.

IIV Yo‘l harakati xavfsizligi xizmatining so‘rovnomasiga asosan Oltinsoy tuman tibbiyot birlashmasi vrachi, narkolog tomonidan narkologik ekspertiza o‘tkazilib, 18 apreldagi «Mastlik holatini aniqlash bo‘yicha tibbiy tekshiruvdan o‘tkazganlik to‘g‘risida»gi xulosasida mastlik holati aniqlanmagani qayd etilgan.

Hozirda mazkur yo‘l-transport hodisasi yuzasidan YHXX va ichki ishlar tergov organi tomonidan dastlabki surishtiruv ishlari olib borilmoqda. Surishtiruv natijalari yuzasidan qo‘shimcha ma’lumot beriladi.

#Agrobank #Oltinsoy