Klub prezidenti Joan Laporta va Xavi ishtirokida o‘tkazilgan matbuot anjumanida ispaniyalik murabbiy jamoada qolishiga nimalar turtki bo‘lganini aytib o‘tdi.

«Klubda boshlagan loyihamiz davom etadi. Fikrimcha, bu klub uchun ham yaxshi qaror. «Barsa»ning ashaddiy muxlisiman. Klubda rahbariyat, direktorlar kengashining o‘zimga nisbatan yuqori ishonchini his qildim. Futbolchilarning qo‘llab-quvvatlashi ham muhim rol o‘ynadi. Muxlislarga ham menga bo‘lgan ishonch va mehr uchun katta rahmat.

Bu klub uchun qo‘limdan kelgan barcha ishni qilishga tayyorligimni barcha biladi. Klub prezidenti bilan suhbatda o‘z fikrlarimni bildirdim. Nima qilsak, eng avvalo klub uchun yaxshi bo‘lishi haqida ko‘p o‘ylayman.

Yanvarda jamoadan ketishimni e’lon qilganim sababi, o‘shanda mavsum yakunida klubni tark etish – men uchun eng to‘g‘ri qarordek ko‘ringandi. Hozir esa vaziyatga boshqacharoq qarayapman. 

Barchadan minnatdorman va fikrimcha, men endi eng yaxshi qarorni qabul qildim», - deydi Xavi matbuot anjumanida.

Eslatib o‘tamiz, Xavi 28 yanvar kuni «Vilyarreal»dan uchralgan mag‘lubiyatdan (3:5) keyin mavsum yakunida jamoani tark etishini e’lon qilgandi. Shundan so‘ng murabbiy bu fikridan qaytmasligini bir necha marta takrorlagandi. 

Ma’lumot uchun, «Barsa» o‘tgan haftada YeChL chorakfinalida turnirdagi ishtirokini to‘xtatgan bo‘lsa, La Ligada 70 ochko bilan peshqadam «Real»dan 11 ochko ortda qolmoqda.