AQSh Kongressi tomonidan ma’qullanayotgan Ukrainaga yangi yordam paketidagi Amerika qurollarining aksariyati allaqachon Germaniya va Polshadagi omborlarda mavjud bo‘lib, bu ularni Vashingtonning yakuniy qaroridan keyin tezda frontga yetkazib berishga imkon yaratadi. Bu haqda 23 aprel, seshanba kuni CNN manbasiga tayanib xabar berdi.
CNN suhbatdoshiga ko‘ra, birinchi navbatda, artilleriya snaryadlari Ukrainaga o‘tkaziladi, sababi mamlakat armiyasi ular bo‘yicha taqchillikni boshdan kechirmoqda. Ukrainaga yaqin bo‘lishiga qaramay, qurol-yarog‘ yetkazib berish hali ham jiddiy logistika muammosi bo‘lib qoladi, chunki juda ko‘p miqdorda texnikalar jalb etilgan, deb ta’kidlaydi CNN. Rossiyaning qurol-yarog‘ bo‘yicha o‘n barobar ustunligini bu yo‘l bilan qisqa vaqt ichida yengib bo‘lmaydi, deya ta’kidlaydi telekanal.
Pentagon buyruqdan keyin qurollarni tezda topshirishga tayyor
AQSh Mudofaa vazirligi matbuot kotibi Patrik Rayder Vakillar palatasida ovoz berishdan bir necha kun oldin so‘zlagan nutqida, AQSh harbiy departamenti qurol-yarog‘larni topshirish bo‘yicha har qanday buyruq berilishi bilanoq «tezda reaksiya ko‘rsatishga tayyor»ligini aytdi.
«Sizga ma’lumki, bizda harbiy aktivlarni tez ko‘chirish imkonini beruvchi juda kuchli logistika tarmog‘imiz bor. O‘tmishda qilganimizdek, yuklarni bir necha kun ichida olib o‘tishimiz mumkin», - dedi Pentagon vakili.
Vakillar palatasida Ukrainaga yangi yordamning ma’qullanishi
Respublikachilar ustunlik qiladigan Vakillar palatasi 20 aprel kuni bir necha oylik qarama-qarshiliklardan so‘ng Ukrainaga qariyb 61 milliard dollarlik katta yordam paketini ma’qulladi. Quyi palata ma’qullaganidan keyin qonun loyihasi Senat tomonidan ham tasdiqlandi. Demokratlar ko‘pchilikni tashkil etgan Kongressning yuqori palatasi uni qo‘llab-quvvatladi. AQSh prezidenti Jo Bayden hujjatni darhol imzolashini aytgan.
Yangi budjet kuchga kirganidan keyin Ukrainaga yordamning birinchi partiyasi ushbu maqsadlar uchun 1 milliard dollarni tashkil etadi, deb xabar berdi Reuters amerikalik ikki rasmiyga tayanib. Paketga transport vositalari, Stinger ko‘chma zenit-raketa tizimi uchun o‘q-dorilar, «yuqori harakatlanuvchi raketa artilleriya tizimlari» uchun qo‘shimcha o‘q-dorilar, 155 mm artilleriya snaryadlari, TOW va Javelin uchun tankka qarshi o‘q-dorilar va «jang maydonida darhol foydalanish mumkin bo‘lgan boshqa qurollar» kiradi.
