Germaniya huquq-tartibot idoralari Xitoy Davlat xavfsizlik vazirligining ehtimoliy agentlarini fosh qildi. 22 aprel, dushanba kuni Bad-Gomburg va Dyusseldorf shaharlarida Germaniya Federativ Respublikasi Federal prokuraturasi talabiga binoan josuslik faoliyati va tashqi savdo qonunchiligini buzganlikda gumon qilingan uch nafar Germaniya fuqarosi qo‘lga olindi. 22 va 23 aprel kunlari ular Federal sudning tergov sudyasi huzuriga olib kelinadi, u sudgacha qamoqqa olish to‘g‘risida qaror qabul qiladi. Qo‘lga olinganlarning yashash joyi va idoralarida tintuvlar o‘tkazildi, deb xabar berdi Karlsrue federal prokuraturasi.
Gumonlanuvchilar Xitoyga harbiy kemalar uchun butlovchi qismlar haqida ma’lumot uzatgan
Tergov ma’lumotlariga ko‘ra, Tomas R. Xitoy razvedka xizmati agenti bo‘lib, uning topshirig‘i bilan harbiy maqsadlarda foydalanish mumkin bo‘lgan innovatsion texnologiyalar haqida ma’lumot olgan. Buning uchun u Dyusseldorfda kompaniyaga ega bo‘lgan er-xotin Xervig va Ina F.ning yordamidan foydalangan. Federal prokuraturaga ko‘ra, bu kompaniya Germaniya ilmiy-tadqiqot muassasalari vakillari bilan aloqa o‘rnatish va hamkorlik qilish uchun vositachilik xizmatlarini ko‘rsatgan.
Er-xotin F. Germaniya universitetlaridan biri bilan ilmiy ishlanmalarni topshirish to‘g‘risida shartnoma tuzgan. Shu bilan birga, birinchi bosqichda turli mexanizmlar, jumladan, harbiy kemalar dvigatellari uchun komponentlar sohasida tadqiqotlar o‘tkazish rejalashtirilgan. Xitoy tomonidagi hamkor Xitoy Davlat xavfsizlik vazirligi xodimi bo‘lib, loyiha XXR davlat idoralari tomonidan moliyalashtirilgan, deya xabar beradi Germaniya departamentlari.
Qo‘lga olingan vaqtda gumonlanuvchilar «Xitoyning dengizdagi jangovar salohiyatini kengaytirish uchun foydali bo‘lishi mumkin bo‘lgan» keyingi tadqiqot loyihalari bo‘yicha muzokaralar olib borgan», deyiladi bayonotda. Bundan tashqari, ushbu ma’lumotlarga ko‘ra, ular XXR nomidan maxsus lazer sotib olib, zarur ruxsatsiz Xitoyga eksport qilgan, garchi bu qurilma ikki maqsadli buyumlar bo‘yicha Yevropa Ittifoqi qoidalariga tegishli bo‘lgan.
