Germaniya vitse-kansleri va iqtisodiyot vaziri Robert Xabek so‘nggi paytlarda Rossiya tomonidan, jumladan, energetika infratuzilmasi obektlariga hujumlar ko‘payib borayotgan Ukrainadagi vaziyat tez yaxshilanishiga ishonyapti. Bu haqda u 18 aprel, payshanba kuni Kiyevga tashrifi chog‘ida DW nashriga bergan intervyusida ma’lum qildi.
«Hozirgi paytda Ukrainaga katta bosim bor, ammo bahor-yozda va yil davomida vaziyat osonlashadi, Chexiya juda ko‘p o‘q-dorilarni sotib oldi. Germaniyada ishlab chiqarish ko‘paymoqda. Shuning uchun hozir ular uchun eng qiyin vaqt, ammo vaziyat yaxshilanadi», - dedi Xabek.
Ukrainaga yordam ko‘rsatish bo‘yicha Germaniya ikkinchi o‘rinda
Uning so‘zlariga ko‘ra, AQSh yordamini ajratishdagi kechikishlar sharoitida Germaniya so‘nggi oylarda Ukrainani qo‘llab-quvvatlash mas’uliyatini o‘z zimmasiga oldi, buni Berlinning yaqinda Kiyevga yana bir Patriot havo hujumidan mudofaa tizimini taqdim etish haqidagi qarori tasdiqlaydi.
«Statistikaga nazar tashlasangiz, biz harbiy yordam ko‘rsatish bo‘yicha amerikaliklardan keyin ikkinchi o‘rinda turamiz», – dedi vazir
Xabek o‘rnatilgan amaliyotga qaramay, Germaniya urush holatida bo‘lgan Ukrainaga yordam berayotganiga e’tibor qaratdi. «Agar mamlakat urushda bo‘lsa, defolt xavfi juda va juda yuqori. Shuning uchun biz odatda bunday qilmaymiz. Lekin biz qildik va hozirda jami 46 kompaniya Ukrainaga sarmoya kiritdi. Shunday qilib, biz ko‘p ish qilyapmiz», - dedi u.
Robert Xabek: Ukrainaga havo hujumidan mudofaa tizimlari ko‘proq kerak
Biroq Ukrainaga havo hujumidan mudofaa tizimlari ko‘proq kerak, shuning uchun boshqa davlatlar ham Germaniyadan o‘rnak olishi lozim, dedi vitse-kansler. «Biz, Germaniya, yana bir Patriot tizimini yetkazib berdik va buni birinchi bo‘lib boshqalardan so‘rash va har bir davlat biroz ko‘proq qila olishiga o‘rnak ko‘rsatish uchun qilyapmiz. Boshqa mamlakatlardagi Patriot tizimlari soniga qarasangiz, shunday bo‘ladi. Germaniyadan ko‘ra ko‘proq Patriot tizimlariga ega davlatlar borligini ko‘rish mumkin», dedi Xabek.
Vitse-kansler Ukraina ittifoqchilarini Kiyevga yordamni kuchaytirishga chaqirdi. «Biz tushunishimiz kerak, ukrainaliklarning kurashi - bizning ham kurashimiz», - dedi vazir. Hamkor davlatlar o‘z tizimlarini sinab ko‘rishi va ko‘proq ish qila olishini ko‘rsatishi kerak, dedi u. «Ishonchim komilki, biz ko‘proq narsani qila olamiz. Agar ularda (ukrainaliklar) ko‘proq o‘q-dorilar, mudofaa tizimlari bo‘lganida, elektr stansiyalariga falokatli hujumlar sodir bo‘lmasdi», - deya xulosa qildi u.
Zelenskiy Germaniyaga yordam uchun minnatdorchilik bildirdi
Xabekning Kiyevga tashrifi ortidan Ukraina prezidenti Volodimir Zelenskiy Germaniyaga uning mamlakatini doimiy qo‘llab-quvvatlayotgani uchun minnatdorchilik bildirdi. «Biz Germaniya rahbariyatini alohida qadrlaymiz, bu nafaqat Ukrainada odamlar hayotini himoya qilishda, balki Yevropadagi barchaga yordam beradi», dedi kechki videomurojaatda Zelenskiy.
Uning so‘zlariga ko‘ra, Xabek bilan frontdagi vaziyatni, xususan, havo hujumidan mudofaa zaruriyatini muhokama qilgan. Telegram’dagi alohida postida Ukraina prezidenti Germaniya hukumatining Ukrainada yana bir Patriot havo mudofaa tizimini joylashtirish qarorini ham olqishladi.
