Toshkent shahri hokimi Shavkat Umrzoqov 17 aprel kuni Yakkasaroy va Chilonzor tumanlaridan o‘tuvchi Bo‘rijar kanali bo‘yini obodonlashtirish va sayilgoh tashkil etish loyihasi bilan tanishdi. Bu haqda shahar hokimligi xabar berdi. 

E’lon qilingan fotosuratlarda kanal bo‘yini obodonlashtirish va sayilgoh barpo etish loyihasi chizmalarini ko‘rish mumkin. Bunda kanal bo‘yidagi aholi turar-joylarining «qizil chiziq» hududiga tushgani, ya’ni buzilishi mumkinligi oydinlashadi. 

Kun.uz manbasidan ma’lum bo‘lishicha, ushbu loyiha hali tasdiqlanmagan va hozir muhokama jarayonida. 

Hokimlik xabariga ko‘ra, Umrzoqov poytaxt ekologiya boshqarmasi va O‘simliklar karantini davlat inspeksiyasi mutaxassislari ishtirokida daraxtlarning holatini inventarizatsiya qilish va baholashdan o‘tkazish hamda daraxtlarning kesilmasligi uchun ularning o‘sayotgan joyini hisobga olgan holda loyihaga o‘zgartirishlar kiritish bo‘yicha topshiriqlar bergan.