Rossiyaning bir qator hududlari hali ham suv toshqinidan zarar ko‘rmoqda, ba’zi hududlarda hokimiyat yaqin kunlarda daryolarda suv sathi keskin ko‘tarilishini kutyapti va suv toshqini xavfi tufayli mahalliy aholi uchun evakuatsiya zonasini kengaytirmoqda. Minglab rossiyaliklar vaqtinchalik yashash markazlarida (VYaM) qolmoqda.
Kurgan viloyati: yaqin kunlarda daryolarda suv sathi keskin ko‘tarilishi kutilyapti
17 aprel kuni ertalab Kurgan yaqinidagi Tobol daryosida suv sathi 883 smgacha ko‘tarilib, «xavfli hodisa» darajasidan 33 smga oshib ketdi, «yaqin kunlarda» bahorgi toshqinning maksimal darajasi kutilmoqda Bu haqda Gidrometeorologiya sayti xabar berdi.
17 aprel holatiga ko‘ra, Kurgan viloyatining 13 567 nafar aholisi suv toshqini zonasidan evakuatsiya qilingan, 931 kishi, jumladan, 200 nafar bolalar VYaMda. Rossiya Federatsiyasi Favqulodda vaziyatlar vazirligi hududiy boshqarmasi ma’lumotlariga ko‘ra, 669 ta turar joy va 2376 ta qishloq uylari suv ostida qolmoqda. Kurgan viloyatida favqulodda holat 8 aprel kuni joriy etilgan edi.
Orenburgning deyarli uchdan bir qismi suv ostida qolmoqda
Orenburg chegaralaridagi 89 kvadrat kilometr maydon suv ostida qolmoqda, deb xabar berdi shahar ma’muriyati 17 aprel kuni. Shaharda 6,5 mingdan ortiq uy-joy, jumladan, 55 ko‘p qavatli uy, shuningdek, 11,2 ming yer uchastkasi suv ostida qolmoqda. Orenburg meriyasi ma’lumotlariga ko‘ra, suv bosgan uylardan 1720 kishi, jumladan, 170 nafar bola evakuatsiya qilingan. VYaMda 274 kishi qolmoqda, ulardan 72 nafari bolalar.
Orenburg yaqinidagi Ural daryosida suv sathi 11 metrdan oshib, «xavfli» ko‘rsatkichdan 179 smga ko‘tarilib ketdi, Orenburg viloyatida 4 apreldan so‘nggi o‘n yilliklardagi eng kuchli suv toshqini sababli favqulodda holat joriy etildi.
Tyumen viloyati: evakuatsiya zonasi kengaymoqda
17 aprel kuni ertalab Tyumen viloyatida gubernator avvalroq Ishim daryosida suv sathining «tarixiy maksimal» darajasi tufayli to‘g‘on buzilishi xavfi haqida ma’lum qilgan edi. Ishim tumanida 13 ta aholi punkti, Vikulov tumanida yana 2 ta qishloq aholisi evakuatsiya qilingan. Mahalliy rasmiylar aholini o‘zi bilan eng zarur buyumlar, hujjatlar, dori-darmonlar va qimmatbaho narsalarni olib ketishga chaqirdi.
Tyumen viloyatida suv toshqini xavfi tufayli 8 aprel kuni favqulodda holat joriy etilgan, suv toshqini 23-25 aprel kunlari esa eng yuqori cho‘qqiga chiqishi kutilmoqda. Suv toshqini zonasida deyarli 7,3 ming kishi istiqomat qiladigan 50 dan ortiq aholi punktlari mavjud.
Tomsk viloyati: Tomda suv sathi pasaymoqda, Obda esa ko‘paymoqda
Mintaqaviy boshqaruv markazi ma’lumotlariga ko‘ra, Tomsk viloyati chegaralaridagi Tom va Ob daryolarida oxirgi 24 soat ichida suv sathi turli dinamikani ko‘rsatdi. Tomskning ikki hududida Tom daryosidagi suv 14 sm va 54 smga pasaydi, «xavfli hodisa» belgisidan oshib ketilmadi. Shu bilan birga, Nikolskoye qishlog‘i yaqinidagi Ob daryosida suv sathi 14 smga ko‘tarilib, 988 smni tashkil etdi, «xavfli» ko‘rsatkich - 864 sm.
Tomsk shahri, Tomsk va Shegar tumanlari hududida to‘rtta aholi punkti va bitta dalahovli posyolkasi suv ostida qolmoqda. 84 kishi, jumladan, 8 nafar bola evakuatsiya qilindi. VYaMda 13 kishi, jumladan, 6 nafar bola bor.
