Tatariston hukumati 14 yoshdan boshlab imkon qadar ko‘proq yoshlar va o‘smirlarni ishga, jumladan, mudofaa korxonalariga jalb qilmoqchi, deb yozadi 15 aprel, dushanba kuni «Kommersant» gazetasi.

Jurnalistlar yoshlar bandligini ta’minlash bo‘yicha yangi hududiy dastur asosida shunday xulosaga keldi. Hozir u korrupsiyaga qarshi ekspertizadan o‘tmoqda, deb yozadi nashr. «Ilgari Respublika Davlat kengashi Mehnat kodeksiga 16 yoshdan oshgan o‘smirlarni zararli va xavfli ishlab chiqarishlarda ishlashga ruxsat beruvchi tuzatish loyihasini tayyorlagan», deb eslatadi «Kommersant».

Yoshlar bandligini ta’minlashga ko‘maklashish bo‘yicha yangi dastur 14 yoshdan 18 yoshgacha bo‘lgan o‘smirlarni ish bilan ta’minlashni soddalashtirish hamda «ijtimoiy xavfli vaziyatdagi oilalar»dan bo‘lgan voyaga yetmaganlarni ishga joylashtirishga ko‘maklashishi rejalashtirilgan. Hujjatning alohida bandlarida «35 yoshgacha bo‘lgan yoshlarni qishloq xo‘jaligida va harbiy-sanoat kompleksi korxonalarida ish bilan ta’minlashga ko‘maklashish» haqida so‘z boradi, deb ta’kidlaydi «Kommersant». Shuningdek, Tataristonda «Uzoq Sharq va Arktikaning ustuvor hududlariga yoshlarning mehnat harakatchanligini rag‘batlantirish bo‘yicha axborot kampaniyasi» o‘tkaziladi.

Tataristonda kollej o‘quvchilarining dronlarni yig‘ishi

2023 yil iyul oyida «Protokol» nashri va «RZVRT» YouTube-kanali qo‘shma surishtiruvni e’lon qildi, unda Tataristondagi «Alabuga» maxsus iqtisodiy zonasida «Alabuga Politex» kollejining voyaga yetmagan o‘quvchilari Shahed dronlarini yig‘ishga, shu jumladan, ishlashdan bosh tortganlik uchun jarimalar va o‘qishdan chetlatish bilan tahdid qilish orqali jalb qilingani aytiladi. Avvalo, manbalarga ko‘ra, gap maktabning 9-sinfidan keyin kollejga o‘qishga kirgan 15 yoshdan 17 yoshgacha bo‘lgan o‘smirlar haqida ketmoqda.