2023 yil noyabri oxirida Toshkent shahar Mirzo Ulug‘bek tumanidagi 99-maktab hududida 8-sinf o‘quvchisi ochiq elektr simiga tegib ketib, tok urishi oqibatida vafot etgan edi.
O‘shanda poytaxt maktab ta’limi boshqarmasi bolani elektr toki urganini rad etib, u o‘yin maydonchasidan chiqib ketayotganda hushini yo‘qotgani, keyinroq kasalxonada vafot etganini bildirgan.
Keyinchalik sud tibbiy ekspertizasining dastlabki xulosasi o‘quvchining o‘limiga elektr toki urishi sabab bo‘lganini ko‘rsatdi.
16 aprel kuni jinoyat ishlari bo‘yicha Mirzo Ulug‘bek tuman sudi sudyasi Bahodir Qayumov raisligida bu jinoyat ishi ko‘rib chiqildi. Sud majlisida jabrlanuvchilar ayblanuvchilarga qonun doirasida jazo tayinlashini so‘radi. Bu haqda Kun.uz muxbiri xabar bermoqda.
Jinoyat kodeksining 207-moddasi 3-qismi “a” bandi (mansabga sovuqqonlik bilan qarash odam o‘limiga sabab bo‘lishi) bilan ayblanayotgan 99-maktabning sobiq direktori va o‘rinbosari so‘zida suddan yengillik berishni so‘rab, ishidan pushaymonligini bildirdi.
Sud hukmiga ko‘ra, sobiq direktorning xo‘jalik ishlari bo‘yicha o‘rinbosari Q.R. JKning 207-moddasi 3 qismi “a” bandi bilan aybdor deb topilib, 2 yil rahbarlik lavozimida ishlamaslik va 4 yil ozodlikdan mahrum qilish jazosi tayinlandi. U jazo muddatini manzil koloniyada o‘tashi belgilandi.
Maktabning sobiq direktori R.M. ham yuqoridagi modda bilan aybli deb topilib, unga 2 yil rahbarlik lavozimida ishlashi taqiqlandi, 4 yilga ozodlikni cheklash jazosi tayinlandi.
