O‘zbekiston elchisi Ayubxon Yunusov Farg‘ona viloyati hokimi Xayrulla Bozorov, Buxoro viloyati hokimining investitsiyalar va tashqi savdo masalalari bo‘yicha o‘rinbosari Rizo Asadov hamda Toshkent shahrining Sirg‘ali tumani hokimi Elbek Shukurov bilan onlayn uchrashuvlar o‘tkazdi, deb xabar qilmoqda "Dunyo".

Ularda O‘zbekiston va Kuvayt hududlari o‘rtasida savdo-iqtisodiy, investitsiyaviy hamkorlik aloqalarini kengaytirish, hududlararo munosabatlarni yanada rivojlantirish, amalga oshirish rejalashtirilgan investitsiyaviy loyihalarga xorijiy sarmoyalarni jalb qilish istiqbollari muhokama qilindi.

Taklif etilayotgan investitsiyaviy loyihalar Kuvaytning yirik tadbirkorlari o‘rtasida keng targ‘ib etilishi bildirildi. Shuningdek, ushbu loyihalarni amalga oshirishga qiziqish bildirgan biznes vakillari bilan alohida muzokaralar tashkil etishda ko‘mak ko‘rsatilishi ta’kidlandi  

Bundan tashqari, tomonlar joriy yil 13-14 may kunlari Kuvaytda o‘tkazilishi rejalashtirilayotgan O‘zbekiston-Kuvayt biznes forumida Farg‘ona va Buxoro viloyatlari hokimliklari hamda ishbilarmon doira vakillarining ishtirokini ta’minlash masallari xususida fikr almashdi.