Germaniya bojxona xizmati Atlantic Navigator II yuk kemasini Rossiyaga qarshi sanksiyalarni buzganlikda gumon qilib, Rostok portida ushladi, deb xabar berdi dpa 2 aprel, seshanba kuni.
«Yevropa Ittifoqi sanksiyalariga duchor bo‘lgan tovarlar bortda bo‘lgani sababli, kemani bojxonada ushlab turish to‘g‘risida buyruq olindi. Shuning uchun portni tark etish taqiqlanadi», - deya ma’lum qildi Rostok portlari va dengizchilari boshqarmasi.
Ossee-Zeitung (OZ) gazetasining yozishicha, Marshall orollari bayrog‘i ostida suzayotgan 193 metr uzunlikdagi yuk kemasi vintdagi texnik nosozliklar tufayli 4 mart kuni Rostok portiga ta’mirlash ishlarini amalga oshirish maqsadida kirgan.
Ushlash holatiga kema bortidagi qanday yuk sabab bo‘lgani haqida rasman xabar berilmagan. Ossee-Zeitung’ning ikki manbasiga ko‘ra, kema Qo‘shma Shtatlarga yo‘l olgan hamda unga qayin yog‘ochi va Amerika atom elektr stansiyalari uchun boyitilgan uran ortilgan. Yukning umumiy qiymati taxminan 40 million yevroga baholanmoqda.