1 apreldan boshlab “Uzbekistan Airways” aviakompaniyasining Qo‘qon — Toshkent, Mo‘ynoq — Nukus yo‘nalishlarida aviaparvozlari yo‘lga qo‘yiladi. Qatnovlar yengil L-410 samolyotlarida amalga oshiriladi.

Qayd etilishicha, Toshkent — Qo‘qon — Toshkent yo‘nalishida qatnovlar har kuni bo‘ladi: Toshkentdan uchish soat 11:30 da, Qo‘qonga qo‘nish soat 12:30, Qo‘qondan uchish soat 13:00 da, Toshkentga yetib kelish soat 14:00 da amalga oshiriladi.

Nukus — Mo‘ynoq — Nukus yo‘nalishi bo‘yicha parvozlar esa haftasiga uch marta: dushanba, juma va yakshanba kunlari qo‘yilmoqda. Nukusdan jo‘nab ketish soat 09:00 da, Mo‘ynoqqa yetib kelish 09:35, Mo‘ynoqdan jo‘nash soat 10:05 da, Nukusga yetib kelish 10:40 da bo‘ladi.

Ma’lumot uchun, yaqinda Farg‘onadagi mahalliy Qo‘qon aeroportida rekonstruksiya ishlari yakunlanib, foydalanishga topshirilgandi. Ta’mirlash ishlariga jami 156 mlrd so‘m sarflangani aytilgan edi.

2022 yil sentabr oyida “Uzbekistan Airways” Nukus – Mo‘ynoq – Toshkent yo‘nalishida qatnovlar yo‘lga qo‘yilayotganini ma’lum qilgandi. Ammo AJning onlayn chipta olish mumkin bo‘lgan saytida bu yo‘nalishdagi parvozlar mavjud emas.

Shuningdek, prezidentning tegishli qarori bilan 2023 yil martdan bir qancha yo‘nalishlar qatorida Samarqand – Mo‘ynoq yo‘nalishida ham muntazam aviaqatnovlar boshlanishi kerak edi. Lekin bu ham hozirgacha amalga oshgani yo‘q.