Farg‘ona shahridagi bolalar shifoxonasi hududida o‘rmon fondiga kirmaydigan ko‘p yillik qarag‘ay daraxti hech qanday ruxsatnomasiz kesib tashlandi. Bu haqda Ekologiya vazirligi xabar berdi. 

Qayd qilinishicha, daraxt shifoxona hududida texnik xodim M.I. tomonidan kesilgan. 18 mart kuni shahar ekologiya bo‘limi davlat inspektorlari tomonidan daraxtlarni kesmaslik to‘g‘risida ogohlantirish xati berilgan. Ammo xodim bunga amal qilmagan. 

Daraxt kesilishi oqibatida tabiatga 36 million 500 ming so‘m zarar yetkazilgan. Huquqbuzarga nisbatan Ma’muriy javobgarlik to‘g‘risidagi kodeksning 79-moddasi 1-qismiga asosan ma’muriy bayonnoma rasmiylashtirilib, BHM 25 baravari (8 million 500 ming so‘m) miqdorida jarima belgilangan. M.I. qilmishi uchun umumiy hisobda 45 million so‘m to‘lashi ta’kidlanmoqda. 

Shuningdek, Vazirlar Mahkamasining «Davlat o‘rmon fondiga kirmaydigan daraxtlar va butalarni ekish, parvarish qilish va ulardan foydalanish tartibini yanada takomillashtirish to‘g‘risida»gi qaroriga asosan, huquqbuzarga 100 tup daraxt ko‘chatini kompensatsiya tarzida ekish hamda ularni kamida 3 yil parvarish qilish majburiyati yuklatilgan.