O‘zbekistonda aholini chang bo‘roni va havo ifloslanishidan ogohlantirish boshlanadi

1 martdan aholini chang bo‘roni va havo ifloslanishidan ogohlantirishni boshlash rejalashtirilmoqda. Qurilish obektlarida chang va qum zarrachalari havoga ko‘tarilishini bartaraf etish bo‘yicha majburiy talablar joriy etiladi.

Foto: Kun.uz

O‘zbekistonda 1 martdan chang bo‘roni sodir bo‘layotganda va atmosfera havosida mayda dispers zarrachalari belgilangan me’yordan yuqori bo‘lgani aniqlanganda aholini ogohlantirish amaliyoti joriy etiladi.

Prezident imzolagan «O‘zbekiston — 2030» strategiyasini 2024 yilda amalga oshirishga oid davlat dasturi to‘g‘risidagi farmonga ko‘ra, yurak-qon tomir va nafas yo‘llari kasalliklariga chalingan hamda sog‘lig‘i havoning ifloslanishiga ta’sirchanligi yuqori bo‘lgan boshqa fuqarolar zarur profilaktik choralar haqida muntazam xabardor qilinadi.

Farmonda mart oyidan boshlab o‘lchami 500 metr kvadrat va undan ortiq bo‘lgan qurilish obektlarida, unga kirib-chiqish yo‘llarida chang va qum zarrachalarining havoga ko‘tarilishini bartaraf etish bo‘yicha majburiy talablar joriy etish topshirilgan.

#Toshkent #ekologiya #havo ifloslanishi