Amsterdam apellyatsiya sudi Rossiyaning YuKOS neft kompaniyasi sobiq asosiy aksiyadorlariga 50 milliard dollar to‘lash majburiyatini yuklagan hakamlik sudi qarorini bekor qilish haqidagi iltimosini rad etdi. Reuters agentligining 20 fevral, seshanba kuni qayd etganidek, apellyatsiya sudi qarori oldidan Niderlandiya sudlarida ko‘p yillik sud jarayonlari bo‘lgan. Haagadagi arbitraj sudi 2014 yilda Moskva Rossiyaning sobiq eng yirik neft kompaniyasi bo‘lgan YuKOSni bankrot qilishga qaratilgan harakatlarni amalga oshirib, xalqaro majburiyatlarini buzganini aniqladi.
Amsterdam apellyatsiya sudi qarori ustidan yutqazgan tomon Niderlandiya oliy sudiga shikoyat qilishi mumkin. RBK agentligi ta’kidlaganidek, Niderlandiyaning De Brauw Blackstone Westbroek yuridik firmasi mutaxassislari bahsda YuKOS sobiq aksiyadorlari manfaatlarini himoya qilgan. Niderlandiya oliy sudi qarori qabul qilinishiga bir yarim yildan ikki yilgacha vaqt ketishi mumkin, deb hisoblanmoqda.
YuKOS aksiyadorlariga pul to‘lamaslik uchun
2015 yil 4 dekabrda Rossiya Davlat dumasi Rossiya Federatsiyasi Konstitutsiyaviy sudiga Rossiyada xalqaro sudlar qarorlarini amalga oshirishni imkonsiz deb tan olish huquqini beruvchi qonunni qabul qildi. Bu Rossiya hukumatiga xalqaro organlarning Rossiyada huquqlari buzilganidan shikoyat qilgan yuridik va jismoniy shaxslar foydasiga qabul qilingan qarorlarini e’tiborsiz qoldirish imkonini beradi.
Ushbu qonun loyihasining qabul qilinishiga faqat uch nafar rossiyalik parlamentariy qarshi ovoz berdi. Ulardan biri Dmitriy Gudkov, o‘shanda u yangi qonun yagona maqsad - «YuKOS ishi» bo‘yicha qarorlar ijrosini chetlab o‘tishni ko‘zlayotganini ta’kidladi, buning asosida Rossiya Federatsiyasi ushbu kompaniya aksiyadorlariga 50 milliard dollar to‘lashi shart.
