Rossiya bosh vaziri Mixail Mishustin davlat nazorati ostida bo‘lishi shartligi belgilangan giyohvandlik vositalari ro‘yxatiga o‘zgartirishlar kiritish to‘g‘risidagi qarorni imzoladi. 

Ro‘yxatga yangi moddalar qo‘shilgan, jumladan Péganum hármala (rus tilida Gramala) o‘simligi ham kiritilgan. U O‘zbekistonda isiriq nomi bilan tanilgan. 

Isiriq nega taqiqlangan o‘simliklar ro‘yxatiga kiritilganiga rasman izoh berilmagan. Bunga o‘simlik tarkibida psixotrop alkaloidlar mavjudligi sabab bo‘lishi mumkin. 

O‘simlikning o‘nga yaqin nomi mavjud. U Eron va Tojikistonda «hazor ispand», Ozarboyjon va Turkmanistonda «yuzarlik», Qozog‘istonda «adiraspand», O‘zbekiston va Qirg‘izistonda «isiriq» nomi bilan mashhur bo‘lib, odatda xalq tabobatida og‘riq qoldiruvchi vosita sifatida, shamollash va tumovga qarshi, ommaviy epidemiyalar paytida ishlatilgan. 

2020 yilda Turkmaniston prezidenti Gurbanguli Berdimuhamedov koronavirusning oldini olish maqsadida aholi uylarida isiriq tutatish bo‘yicha maxsus tadbirlar o‘tkazishni buyurdi. Uning so‘zlariga ko‘ra, «Ko‘p asrlik hayot amaliyoti isiriq tutuni inson tanasiga ko‘zga ko‘rinmas turli viruslarning kirib borishini faol ravishda oldini oluvchi samarali vosita ekanini tasdiqladi», dedi u. 

2020 yilda O‘zbekiston Sanitariya-epidemiologiya nazorati davlat inspeksiyasi boshlig‘i Nurmat Otabekov isiriq inson immunitetini kuchaytirishda muhim vosita ekanini aytgan edi. 

«Tabiat ne’matlaridan uzoqlashmaslik kerak. Masalan, isiriq o‘simligining ham foydasi juda katta», dedi mutaxassis.