O‘zbekistonda aholiga yana 60 ming gektar yer tarqatiladi

O‘zbekiston 13:08 / 12.02.2024 14870

Prezident raisligida o‘tkazilayotgan yig‘ilishda meva-sabzavot yetishtirish va eksportini oshirish masalalari ham muhokama qilindi.

Ta’kidlanishicha, shu maqsadda aholiga yana 60 ming gektar yerlar tarqatiladi. Buning natijasida 1,5 mln tonna qo‘shimcha mahsulot olib, eksportni yana 200 mln dollarga oshirish mumkin bo‘ladi. Yoshlarni dehqonchilikka yaxshi o‘qitib, bu yerlarda band qilish muhimligi ta’kidlandi.

Shuningdek, aholiga bo‘lib berilgan yer maydonlari hamda tomorqa yerlariga sanoat va kooperatsiyani keng olib kirib, qo‘shimcha 1 mlrd dollarlik mahsulot yetishtirish mumkinligi qayd etildi.

Buning uchun 1 trln so‘m kredit uchun resurs ajratiladi. Ushbu kreditlar kooperatsiya asosida mahsulot yetishtirish, texnika, aylanma mablag‘ uchun 100 mln so‘mgacha garovsiz, 150 mln so‘mgacha garov ta’minoti 50 foizga pasaytirilgan holda beriladi.

Jami 10 mingta texnika fermer va dehqonlarga 10 yil muddatga 3 yil imtiyozli davr bilan lizingga beriladi. Chetdan olib kelinib, lizingga beriladigan motokultivator va minitraktorlarga bojxona imtiyozi 3 yilga uzaytiriladi.

Bundan tashqari, yig‘ilishda issiqxonalarda mahsulot yetishtirishni qo‘llab-quvvalash bo‘yicha qo‘shimcha choralar belgilab olindi. Issiqxona xo‘jaliklarini kreditlash mexanizmini qayta ko‘rib chiqish topshirildi.

Prezident yoqilg‘isiz isitiladigan, ixcham issiqxonalarni barpo qilish tajribasini qo‘llab-quvvatlab, tayyor holda topshirish sharti bilan 10 sotixli 200 tagacha ixcham issiqxona qurish vazifasini qo‘ydi. Ushbu maqsadlarga “Oilaviy tadbirkorlik” dasturi doirasida 100 mln so‘mgacha garovsiz kredit beriladi.

Ko‘proq yangiliklar: