Qashqadaryo viloyati Shahrisabz tumanida ikki yil oldin, 15 yoshida unashtirilgan qiz unga yigit tomonidan turli bosimlar o‘tkazilganini aytgan. U mazkur masalada Bolalar ombudsmaniga murojaat qilgani va hozirda holat tashkilot nazoratiga olingani ma’lum qilindi.
«M.M.ning aytishicha, hozirda u universitetning 1-kursida o‘qimoqda va o‘qishini davom ettirish niyatida. Bir necha yildan buyon tanishi bo‘lgan O.B. (yigit) unga turmushga chiqishiga undab, turli shaklda bosim o‘tkazib kelmoqda. O.B. va M.M.ning ota-onalari o‘zaro kelishib, qizning roziligisiz unashtiruv marosimini o‘tkazgan bo‘lib, hozirda O.B. tomonidan unga turmushga chiqishga undab, ruhiy bosim o‘tkazilmoqda», deyiladi xabarda.
Qiz Kun.uz muxbiri bilan suhbatda aytishicha, uni 2 yil avval – hali 15 yoshligida unashtirib qo‘yishgan.
«Men hali o‘qishni, o‘z sohamda o‘rnimni topishni istayman. Keyingi vaqtlarda unga nisbatan ham fikrim o‘zgarganini sezganidan keyin menga nisbatan turli bosimlar, tahdidlar qila boshladi. Agar unga tegmasam o‘z joniga qasd qilishini aytib qo‘rqitdi. Hattoki ijarada yashaydigan kvartiramizga kelib janjal ko‘taradi», deydi u.
Ayni paytda holat Bolalar ombudsmani, prokuratura va ichki ishlar organlari tomonidan o‘rganilib, qizga himoya orderi berilgan. Uning ota-onasiga esa qizini turmushga chiqishga majburlash jinoiy javobgarlikka asos bo‘lishi va buning huquqiy oqibatlari tushuntirilgan.
- Ma’lumot uchun, Ma’muriy javobgarlik to‘g‘risidagi kodeksning 47−3-moddasiga (Nikoh yoshi to‘g‘risidagi qonunchilikni yoki nikoh tuzish tartibini buzish) ko‘ra, ushbu huquqbuzarlik BHMning 5 baravaridan 10 baravarigacha miqdorda jarima solishga sabab bo‘ladi. Ayolni erga tegishga majbur qilish yoki uning erga tegishiga to‘sqinlik qilganlik uchun esa Jinoyat kodeksining 136-moddasiga ko‘ra, jarima, axloq tuzatish ishlari, 3 yilgacha ozodlikdan cheklash yoki ozodlikdan mahrum qilish jazolari belgilangan.
- Bundan avvalroq, Qashqadaryo viloyatida qizlarning erta unashtirish holatlari aks etgan videolar muhokamalar markazida bo‘lgan edi.
