O‘nga yaqin amaldorning tadbirkorlik faoliyati cheklandi

Tadbirkorlik sub’yektlarida ta’sischi yoki ulushga ega bo‘lgan bir qator mansabdor shaxslarning tadbirkorlik faoliyati cheklandi. Bu haqda Korrupsiyaga qarshi kurashish agentligi xabar berdi. 

Qayd qilinishicha, manfaatlar to‘qnashuvi holatlarini bartaraf etish yuzasidan agentlik tomonidan chora ko‘rilgan. Jumladan, quyidagi mansabdorlarning tadbirkorlik sub’yektlarida ta’sischilik va rahbarlik faoliyati tugatilgan:

- “Qimmatli qog‘ozlar markaziy depozitariysi” DUK bosh direktori Sherali Abdujabborov;

- Toshkent shahri, Mirobod tumani hokimi Anvar Sayfutdinov;

- “Milliy antidoping agentligi” rahbari Abdushukur Sodiqov;

- “Axborotlashtirish bosh markazi” UK rahbari Dilshod Sarixo‘jayev;

- Andijon viloyati, Bo‘ston tumani hokimi Sanobar Nosirova;

- “Milliy PR-markazi” DUK direktori Dilfuza Samandarova;

- Energetika vaziri o‘rinbosari Umid Mamadaminov;

- Farmatsevtika tarmog‘ini rivojlantirish agentligi direktori Abdulla Azizov.

Kun.uz oldinroq “biznesmen” hokimlar aqida surishtiruv e’lon qilgandi. Mazkur surishtiruvda Andijon viloyati Bo‘ston tumani hokimi Sanobar Nosirova hamda Mirobod tumani hokimi Anvar Sayfutdinov tadbirkorlik sub’yektlarida ulushga egaligi ma’lum qilingandi.

Eslatib o‘tamiz, 2022 yil 10 noyabrda kuchga kirgan “Davlat fuqarolik xizmati to‘g‘risida”gi qonunda davlat fuqarolik xizmatini o‘tash bilan bog‘liq cheklovlar kiritilgan. Xususan, davlat fuqarolik xizmatchisi tadbirkorlik faoliyati bilan shug‘ullanishga, jumladan, tadbirkorlik faoliyati sub’yektlarini tashkil etishga, ularning muassisi (ishtirokchisi) bo‘lishga, tadbirkorlik faoliyati sub’yektida tashkiliy-boshqaruv, ma’muriy-xo‘jalik vazifalarini bajarishga haqli emas. Shuningdek, Vazirlar Mahkamasining 1992 yil 6 martdagi qarori bilan davlat hokimiyati va boshqaruv organlarining xodimlari tadbirkorlik faoliyati bilan shug‘ullanishi taqiqlangan.